Qazaqstanda perzenthana, balalar statsionary men jedel járdem stantsiialarynyń basshylary jáne olardyń orynbasarlaryn attestattaý kezinde árbir besinshi qatysýshy qajetti ball jinai almaǵan. 2026 jylǵy 2 qarashadaǵy jaǵdai boiynsha testileýge qatysqan 235 adamnyń 47-si mejeden óte almady, dep habarlaidy ult.kz.
Densaýlyq saqtaý ministrliginiń málimetinshe, testileý 14 qazannan beri jalǵasyp keledi. Qazirgi ýaqytta attestattaýdan ótýge tiis mamandardyń 72,1 paiyzy synaq tapsyrǵan.
Nátijesinde 188 adam nemese qatysýshylardyń 80 paiyzy testileýden sátti ótken. Al qajetti ball jinai almaǵandardyń qatarynda 25 basshy men 22 orynbasar bar. Taǵy 27 adam testileýge kelmegen.
Teris nátije kórsetkender Aqmola, Mańǵystaý jáne Qostanai oblystarynda kóp tirkelgen. Bul úsh óńirge testileýden óte almaǵandardyń 55,3 paiyzy tiesili. Al Astana men Pavlodar oblysynda barlyq qatysýshy qajetti ball jinaǵan.
Testileýden ótpegender suhbattasý kezeńine jiberilmeidi. Olar alty aidan keiin qaita attestattaýdan ótýi kerek.
Aita keteiik, attestattaý tek perzenthanalar, balalar statsionarlary men jedel meditsinalyq járdem stantsiialarynyń basshylary jáne olardyń orynbasarlaryna júrgiziledi. Testileý 2026 jylǵy jeltoqsannyń sońyna deiin jalǵasady. Al jariialanǵan kórsetkishter – birinshi kezeńniń aralyq nátijeleri.
