Abai oblysyna jumys saparymen Qazaqstan Halyq Keńesiniń múshesi Nurtai Sabilianov pen Quryltai depýtaty Airat Bazenov bastaǵan delegatsiia keldi. Sapar aiasynda qonaqtar óńir jastary, stýdentter jáne pedagogter qaýymdastyǵymen birqatar kezdesý ótkizip, Memleket basshysynyń Joldaýynyń negizgi baǵyttaryn túsindirip, ony júzege asyrýdyń naqty qadamdaryn talqylady.
Jumys saparynyń alǵashqy aialdamasy Shákárim ýniversiteti boldy. Munda stýdent jastar men professor-oqytýshylar quramy qatysqan ashyq dialog ótti.
Kezdesýdi ashqan «Shákárim ýniversiteti» KeAQ basqarma tóraǵasy Dýman Orynbekov Qazaqstan halqyna arnalǵan jańa Joldaýǵa qatysty qoǵamdyq talqylaýdyń strategiialyq mańyzyn atap ótti.
«Biz Prezident Joldaýynyń negizgi baǵyttaryn jan-jaqty talqylap, ózekti máseleler boiynsha pikir almasý úshin jinaldyq. Búgingi kezdesýge Quryltai depýtaty Airat Bazenov pen Qazaqstan Halyq Keńesiniń múshesi Nurtai Sabilianov kelip otyr. Aldaǵy ýaqytta qazaqstandyq jastar úshin qandai jańa perspektivalar men múmkindikter ashylatynyn, sonyń ishinde mansaptyq jáne kásibi damý máselelerin talqylaimyz», – dedi Dýman Orynbekov.
Óńirdi damytý taqyrybyn jalǵastyrǵan Qazaqstan Halyq Keńesiniń múshesi Nurtai Sabilianov Memleket basshysynyń infraqurylymdyq bastamalaryna toqtalyp, olardyń óńir turǵyndary úshin mańyzyn atap ótti.
«Memleket basshysy óz Joldaýynda infraqurylymdy damytýǵa erekshe nazar aýdardy. Semei qalasynda joldardyń jai-kúii, turǵyn úimen qamtamasyz etý, sondai-aq sý jáne jylýmen úzdiksiz qamtamasyz etý máseleleri áli de ózekti. Osyǵan bailanysty Prezident mundai máselelerdi keshendi sheshý úshin Ulttyq qordan 6,5 trillion teńge bólý jóninde tapsyrma berdi», – dedi Nurtai Sabilianov.
Al Quryltai depýtaty Airat Bazenov jasandy intellekt tehnologiialaryn damytý men tsifrlandyrý máselelerine nazar aýdaryp, bul baǵyttardyń jas mamandar úshin úlken múmkindikterge jol ashatynyn atap ótti.
Sonymen qatar kezdesýge qatysýshylar jastardyń kásibi damýy, kadr daiarlaý sapasyn arttyrý jáne olardyń óńirdiń qoǵamdyq ómirine belsendi aralasýy máselelerin talqylady. Memleket basshysy alǵa qoiǵan negizgi mindetterdiń biri – ekonomikanyń naqty suranysyna sai bilikti mamandar daiarlaý ekeni aityldy.
Erkin pikir almasý barysynda stýdentter ózderin tolǵandyrǵan suraqtaryn qoiyp, naqty usynystaryn ortaǵa saldy. Delegatsiia ókilderi aitylǵan pikirler men usynystar jinaqtalyp, tiisti memlekettik organdardyń qaraýyna joldanatynyn jetkizdi.
Budan keiin delegatsiia Semei qalasyndaǵy Biznes jáne servis kolledjine baryp, oqý ornynyń ákimshiligimen jáne pedagogikalyq ujymymen kezdesti.
Qazirgi qoǵamdaǵy muǵalimniń róli men bilim berý salasyn qoldaýǵa baǵyttalǵan júieli sharalar týraly sóz qozǵaǵan Nurtai Sabilianov pedagogterdiń el bolashaǵyndaǵy mańyzdy rólin atap ótti.
«Memleket basshysy óz Joldaýynda bilim berý salasyna erekshe nazar aýdardy. Osy baǵytta birqatar naqty tapsyrmalar berildi. Qazaqstanda muǵalimderdiń quqyqtaryn qorǵaýǵa baǵyttalǵan «Pedagog mártebesi týraly» zań qoldanysta. Degenmen bilim berý salasynda qaǵazbastylyq pen pedagogterdi ózderine tán emes jumystarǵa tartý máseleleri áli de bar. Mundai jaǵdailardy tolyq boldyrmaý úshin zańnamany jetildirip, muǵalimderdiń quqyqtaryn qorǵaý baǵytyndaǵy jumysty júieli túrde jalǵastyrý qajet. Pedagog mártebesi qoǵamda erekshe oryn alýy tiis. Óitkeni balalarymyzdyń bilim sapasy tikelei muǵalimderdiń eńbegine bailanysty», – dedi Nurtai Sabilianov.
Otandyq bilim berý júiesin jańǵyrtý taqyrybyn jalǵastyrǵan Airat Bazenov inkliýzivti bilim berýdi júieniń damý deńgeiin kórsetetin mańyzdy baǵyttardyń biri retinde atap ótti.
«Prezident 2026 jylǵy 10 qazanǵa deiin pedagogterdiń ar-namysy men qadir-qasietin qurmetteý jáne qorǵaý máseleleri boiynsha keshendi usynystar ázirleýdi tapsyrdy. Muny asa mańyzdy qoldaý sharasy dep sanaimyn. Búginde elimizde 7 millionǵa jýyq bala men oqýshy bar. Bul – halyqtyń úshten birine jýyǵy. Sonymen qatar inkliýzivti jáne arnaiy bilim berýdi qajet etetin balalardyń sany jyl saiyn artyp keledi. Qazir olardyń sany shamamen 237 myńǵa jetti. Memleket ár balanyń kedergisiz bilim alýyna, qurdastarymen birge oqýyna jáne jeke qajettilikterine sáikes qajetti qoldaý alýyna jaǵdai jasaýy tiis», – dep túiindedi Airat Bazenov.
Talqylaý qorytyndysy boiynsha pedagogter qaýymdastyǵynyń ókilderi de óz pikirlerimen bólisti.
«Joldaýda aitylǵan pedagogterdi qoldaý jáne bilim berý júiesine erekshe nazar aýdarý sharalary bizge erteńgi kúnge senim uialatady. Muǵalim mártebesin qorǵaý, artyq eseptilikten aryltý jáne inkliýzivti ortany damytý máseleleriniń Prezidenttiń jeke baqylaýynda bolýy biz úshin óte mańyzdy. Bul pedagogterge óz jumysyn sapaly ári jaýapkershilikpen jalǵastyrýǵa jiger beredi», – dedi pedagogter.
