Pavlodarda qaitys bolǵan kásipker Ikram Nurmashovtyń týystary onyń áieli Anar Nurmashovanyń málimdemelerine jaýap berdi. Olar áleýmettik jelide ózderine qarsy qýdalaý júrip jatqanyn aityp, kámeletke tolmaǵan nemeresin janjalǵa tartqany úshin kelinine shaǵymdanǵan. Bul týraly Tengrinews.kz jazdy, dep habarlaidy ult.kz.
Marqumnyń anasy Svetlananyń aitýynsha, otbasy prokýratýra men qorǵanshylyq organdaryna aryz túsirgen. Olar nemeresin áleýmettik jelidegi talqylaýdan, psihologiialyq qysymnan jáne aqsha jinaý naýqandaryna tartýdan qorǵaýdy suraǵan.
Sondai-aq kásipkerdiń týystary qyzdyń sýretteri men beinejazbalary úshinshi tulǵalardyń zańsyz maqsatta paidalaný qaýpine alańdaitynyn jetkizgen.
Al Svetlana jýrnalisterge otbasylyq janjalǵa qatysty tolyq pikir berýden bas tartty. Ol taralǵan jariialanymdardy ulynyń ólimine qatysty tergeýden nazardy basqa jaqqa aýdarý úshin jasalǵan tapsyryspen jazylǵan material dep ataǵan.
Sondai-aq Svetlana Hojametova uly Ikram Nurmashevtyń ólimine qatysty tergeýdiń ádil júrgizilýin talap etip, táýelsiz BAQ pen «Ádil sóz» halyqaralyq qoryna júgindi. Ol qaiǵyly oqiǵaǵa sýdia Marat Musabaevtyń qatysy bolýy múmkin ekenin aityp, tergeý kezinde birqatar zańbuzýshylyq bolǵanyn málimdedi. Al sýdianyń advokaty bul aiyptaýlardy joqqa shyǵaryp, qylmystyq istiń toqtatylǵanyn habarlady.
Svetlana Hojametovanyń aitýynsha, qaiǵyly oqiǵa kezinde katerdi Pavlodar oblysynyń mamandandyrylǵan ákimshilik sotynyń sýdiasy Marat Musabaev basqarǵan. Alaida katerdegi ózge adamdar tergeý barysynda rólde marqumnyń ózi bolǵanyn aitqan.
Marqumnyń anasy bul nusqaǵa kelispeidi. Onyń sózinshe, otbasynyń qolynda buǵan qaishy keletin beinejazbalar bar. Atap aitqanda, ulynyń sýǵa ketken telefonynan tabylǵan videoda Ikram Nurmashevtyń jolaýshy ornynda otyrǵany jáne katerdi basqaryp otyrǵan adamǵa «Gazýi, gazýi!» dep aiqailaǵany estiledi.
Sondai-aq týystary oqiǵaǵa deiin túsirilgen taǵy eki beinejazbada katerdi Marat Musabaev basqarǵany kórinetinin alǵa tartady. Anasy sýdianyń qolynda syra bolǵanyn jáne katerdiń joǵary jyldamdyqpen júrgenin de málimdedi.
