“Qazaq arýy – 2026” baiqaýynyń jeńimpazy Asylym Ótepbergen ózin ósirip, tárbielegen apasynyń ómirden ótkenin málimdedi, dep habarlaidy ult.kz.
Onyń aitýynsha, apasy baiqaýdyń finalyna bir kún qalǵanda qaitys bolǵan. Alaida jaqyndary bul habardy Asylymǵa baiqaý aiaqtalǵannan keiin ǵana jetkizgen.
Jas arý bir jarym ai boiy daiyndyqpen júrip, jaqyndaryna jetkilikti kóńil bóle almaǵanyna ókinish bildirdi. Sol ýaqytta apasy ony saǵynyp, kórgisi kelip júrgen eken.
“Bir jarym ai boiy daiyndyqpen júrip, jaqyndaryma kóńil bóle almadym. Apataiym meni saǵynyp, kórgisi kelip júripti. Al men “qap” dep qaldym. Apamnyń dostaryna jazǵan sońǵy haty “Nemereme erteń laik basyńdar” degen ótinishi edi. Bul jeńisimdi apama arnadym”, – dep jazdy Asylym.
Aita keteiik, Baian Alagózova uiymdastyrǵan baiqaýdyń jeńimpazy anyqtaldy.
"Qazaq arýy" qandai baiqaý?
“Qazaq arýy” — qazaq qyzdarynyń sulýlyǵyn, bilimin, óneri men ulttyq mádenietti meńgerýin baǵalaityn respýblikalyq baiqaý. Joba prodiýser Baian Alagózovanyń bastamasymen 2011 jyly uiymdastyryla bastaǵan. Maqsaty — qazaq qyzynyń ulttyq bolmysyn tanytyp, ana tili men salt-dástúrdi dáripteý.
Baiqaýda qatysýshylardyń qazaq tilinde erkin sóileýine, el tarihy men ádebietin, ádet-ǵuryptaryn bilýine mán beriledi.
Arýlar suraqtarǵa jaýap berip, ónerin kórsetedi, sahnada ózin ustaýy men sándi kiim úlgilerin tanystyrý sheberligi boiynsha da synǵa túsedi.
