Tanymal qazaqstandyq rejisser, prodiýser ári akter Aqan Sataev aýrýhanaǵa túskenin málimdedi. Ol densaýlyǵyna qatysty jaǵdaidy áleýmettik jelidegi paraqshasynda bólisti, dep habarlaidy ult.kz.
Óner iesi qazirgi ýaqytta Atyraý qalasyndaǵy kardiologiia ortalyǵynda em qabyldap jatyr. Alaida aýrýhanaǵa jatýyna ne sebep bolǵanyn ázirge ashyp aitpady.
"Qurmetti dostar! Qazir men Atyraý qalasyndaǵy kardiologiia ortalyǵynda jatyrmyn. Sebebin keiinirek aitarmyn. Eń bastysy – jaqyn arada bul ortalyqtan shyǵyp, “Qan men sert” filmimizdiń túsirilim alańyna qaita oralamyn. Allaǵa shúkir!" – dep jazdy rejisser.
Aqan Sataev ózine meditsinalyq kómek kórsetip jatqan dárigerlerge de rizashylyǵyn bildirdi. Ol ortalyq qyzmetkerleriniń kásibiligi men naýqastarǵa degen janashyrlyǵyn erekshe atap ótti. Rejisserdiń bul jazbasy jelidegi oqyrmandaryn alańdatty. Kópshilik onyń tezirek saýyǵyp, otbasyna jáne shyǵarmashylyq jumysyna aman-esen oralýyn tilep, jyly lebizderin bildirýde.
Aita keteiik, Aqan Sataev qazir "Qan men sert" atty jańa filmniń túsirilimimen ainalysyp jatyr. Rejisser densaýlyǵy jaqsarǵan soń túsirilim alańyna qaita qosylýǵa nietti ekenin jetkizdi.
Ázirge onyń naqty diagnozy men aýrýhanadan qashan shyǵatyny belgisiz.
Aqan Sataev kim?
Aqan Qarǵambaiuly Sataev – qazaqstandyq belgili rejisser, prodiýser, stsenarist jáne akter. Ol 1971 jyly 23 jeltoqsanda Qaraǵandy qalasynda dúniege kelgen.
1994 jyly Temirbek Júrgenov atyndaǵy Qazaq ulttyq óner akademiiasynyń kino jáne televidenie fakýltetin támamdaǵan.
Shyǵarmashylyq jolyn akterlikten bastap, keiin jarnamalyq rolikter túsirýmen ainalysqan. 2003 jyly óziniń Sataifilm kinokompaniiasynyń negizin qalady.
2007 jyly rejisser retindegi alǵashqy tolyqmetrajdy týyndysy – "Reketir" filmin jaryqqa shyǵardy.
Keiin "Jaýjúrek myń bala", "Anaǵa aparar jol", "Tomiris", "Biznesmender" jáne basqa da tanymal kartinalardy túsirdi.
2020 jyly Sháken Aimanov atyndaǵy "Qazaqfilm" kinostýdiiasynyń prezidenti bolyp taǵaiyndalyp, 2022 jyly bul qyzmetten ketti.
