Foto: JI
Sońǵy jyldary Qazaqstanda memlekettik basqarý júiesi qoǵammen ashyq dialog ornatýǵa baǵyttalǵan jańa kezeńge ótti. Prezident bastamashylyq etken «Halyq únine qulaq asatyn memleket» tujyrymdamasy azamattardyń ótinishine jedel jaýap berý mádenietin qalyptastyrýdy kózdeidi. Osy rette Ult.kz tilshisi Májilis depýtattarynan bul qaǵidanyń óńirlerdegi naqty problemalardy sheshýde qanshalyqty tiimdi jumys istep jatqanyn surady.«Kez kelgen azamat bizge habarlasa alady, máselesin jetkizip, qabyldaýymyzǵa kele alady, syn pirin aita alady. Sondyqtan atalǵan kontseptsiia elimizde júzege asyp jatyr dep sanaimyn», – dedi depýtat Sársenǵaliev.
Nartai Sársenǵaliev tilshimizge suqbat berý kezinde aimaqtardaǵy saiajai máselesin kóterip júrgen belsendilermen kezdesýden kele jatqanyn jetkizdi.
«Búgin ǵana belsendi azamattarmen kezdesý ótkizip kele jatyrmyz. Qazir aralyq bir sheshim bar. Saiajai máseleleri boiynsha arnaiy zań jobasyn áriptesterimiz daiyndaý ústinde. Bul uzaq jumysty qajet etedi, biraq saiajaily aýmaqtyń azamattary dál qazir sheshimin talap etip otyrǵandyqtan jáne 2024 jyly sýǵa ketken aimaqtar boiynsha shyryldap júrgen kezde qanshama myńdaǵan saiajaily mekenderdiń sý astynda qalǵanyn kórdik. Óitkeni olar ózenderdiń tabiǵi jaiylmasynan tys qalǵan jáne sol tabiǵi jaiylma aýmaǵyna saiajai úiin salyp alǵandyqtan, keiin sý tasyǵanda ol sý astynda qaldy. Sondyqtan da bul máseleni sheshý kerektigi týraly aittyq. Ony qazir Almaty oblysynda arnaiy ákimdikter barynsha sheshýge tyrysyp jatyr», – dedi halyq qalaýlysy.
Ol bul másele tek turǵyn úimen ǵana emes, qaýipsizdik, infraqurylym jáne jer qatynastary máselelerimen de tikelei bailanysty ekenin aityp otyr.
Aita keteiik, 2024 jylǵy kóktemgi sý tasqyny kezinde tabiǵi apattan zardap shekken óńirlerdegi turǵyndardyń máselesi Memleket basshysynyń tikelei baqylaýyna alynǵan bolatyn.
Qasym-Jomart Toqaev Úkimetke turǵyndardy baspanamen qamtamasyz etý, ótemaqy tóleý jáne infraqurylymdy qysqa merzimde qalpyna keltirý boiynsha naqty tapsyrmalar berdi. Nátijesinde birqatar óńirlerde jańa úiler salynyp, zardap shekken otbasylarǵa páter kiltteri tabystaldy.
Alaida dál sol sý tasqyny kezeńinde kóp jyldan beri qordalanyp kelgen saiajai aýmaqtarynyń máselesi de aiqyn kórindi. Sý basqan aimaqtardyń basym bóliginde saiajai massivteriniń tabiǵi jaiylma aýmaqtaryna ornalasqany anyqtalyp, bul másele qoǵam talqysyna shyqty.
Osydan keiin depýtattar atalǵan problemany kóterip, ony zańnamalyq deńgeide retteý qajettigin málimdedi.
Májilismenniń pikirinshe, bul «Halyq únine qulaq asatyn memleket» qaǵidasynyń naqty kórinisteriniń biri.
Depýtat Muqash Eskendirovtiń aitýynsha, búginde turǵyndardyń áleýmettik jelilerdegi, qoǵamdyq qabyldaýlardaǵy jáne tikelei kezdesýlerdegi ótinishteri nazarsyz qalmaidy. Buryn jaýapsyz qalatyn kóptegen máseleler búginde tsifrlyq platformalar men qoǵamdyq qabyldaýlar arqyly qysqa merzimde tiisti organdarǵa joldanady.
«Bir mandatty sailaý okrýgi boiynsha sailanǵan depýtat retinde men árqashan turǵyndarǵa qabyldaý jasaimyn, eOtinish arqyly bolsyn, jeke telefonmen bolsyn olardyń ótinish-nazyn tyńdap, sheshýge atsalysýǵa tyrysamyn. Qoǵamda sheshiletin de, sheshilmeitin de máseleler bar. Qazir oń ózgeris baiqalady. Men ózim tórtinshi jyl depýtat bolyp otyrǵandyqtan Úkimet tarapynan bolsyn, óńir basshylary tarapynan bolsyn, kóptegen suraqtardyń sheshilip jatqanyn kórip otyrmyn. Degenmen de áli sheshilýi tiis suraqtar da jetkilikti», – dedi Eskendirov.
Depýtattyń sózinshe, «Halyq únine qulaq asatyn memleket» qaǵidasy azamattar men memlekettik organdar arasyndaǵy bailanysty kúsheitýge baǵyttalǵan mańyzdy tetikke ainalyp keledi.
Depýtat Qaraqat Ábdenniń pikirinshe, óńirlerdegi infraqurylym, turǵyn úi, bilim berý jáne áleýmettik qoldaý salalaryndaǵy túitkilderdi kezeń-kezeńimen sheshý jumystary bir óńirde qarqyndy júre, kelesi birinde baiaý jumys istep jatyr.
«Men ózim «Aýyl» partiiasynyń depýtaty bolǵasyn shalǵai aýyldarǵa kóp baramyn. Ár óńir ár túrli. Bir aýyl ekinshisine uqsamaidy. Mysaly Qyzylorda oblysynda ákimimiz myqty boldy. Basqa óńirlerde burynnan sheshilmei kele jatqan máseleler ol jerde sheshilgen. Nemese Ulytaý óńirin alatyn bolsaq, ol jerde kelisilip qoiǵan máseleler áli sheshilmegenin kórdik. Sondyqtan máselelerdiń sheshilýi ár óńir ákiminiń belsendiligine, myqtylyǵyna da bailanysty. Halyqtyń únine qulaq túrgen aýyldar da bar. Jaqynda biraz óńirge baryp keldim. Jańa aityp ótken Qyzylorda oblysynda máseleleri jap-jaqsy sheshilgen aýyldar bar. Osy jaqyn arada men qaraǵandyǵa baramyn. Ol jerdiń de jaǵdaiymen tanysatyn bolamyz. Biz jyl saiyn óńirderge baramyz. Osyndai-osyndai máselelerdi sheshý kerek dep aitamyz. Olarǵa kómektesýge tyrysamyz», – dedi Q. Ábden.
Depýtattardyń pikirinshe, «Halyq únine qulaq asatyn memleket» qaǵidasy bir kúnde nátije beretin joba emes. Degenmen qoǵam men bilik arasyndaǵy ashyq dialog mádenietiniń qalyptasýy – uzaqmerzimdi reformalardyń mańyzdy bóligi. Basty ózgeris – azamattardyń máselesin ashyq aitýy men memlekettik organdardyń oǵan jaýap berý tájiribesiniń qalyptasýy.
Osylaisha, halyq qalaýlylary «Halyq únine qulaq asatyn memleket» qaǵidasy aiasynda azamattardyń ótinishteri men óńirlerdegi ózekti máseleler memlekettik organdardyń nazarynda turaqty túrde kóterilip keletinin jetkizdi. Májilismender halyqpen tikelei kezdesýler, qoǵamdyq qabyldaýlar jáne tsifrlyq platformalar arqyly turǵyndardyń talap-tilegin tyńdaý tájiribesi kúsheigenin atap ótti. Sonymen qatar óńirlerdegi áleýmettik máselelerdi sheshý jumystary ár aimaqta túrli qarqynmen júrgizilip jatqanyn aitty.
