Foto: ashyq derekkóz
Qaraǵandy qalasynda kópqabatty úidiń terezesinen eki kishkentai bala qulap, aýrýhanaǵa tústi. Qaiǵyly oqiǵa 17-shaǵynaýdanda bolǵan, dep habarlaidy Tótenshe jaǵdailar departamentiniń baspasóz qyzmeti.
Vedomstv málimetinshe, 2021 jáne 2024 jyly týǵan eki ul bala eresekterdiń qaraýynsyz qalyp, bes qabatty úidiń ekinshi qabatyndaǵy páter terezesinen qulaǵan.
Túrli dene jaraqatyn alǵan búldirshinder oblystyq balalar aýrýhanasyna jetkizildi. Oqiǵa kezinde páterde eresek adamdar bolmaǵany anyqtalǵan.
Mamandardyń aitýynsha, jyl basynan beri Qaraǵandy oblysynda balalardyń terezeden qulaýyna bailanysty 10 jaǵdai tirkelgen.
Óńirlik TJD ata-analarǵa masaǵa qarsy torlardyń qaýipsizdik quraly emes ekenin eskertti. Qutqarýshylar terezelerge arnaiy bekitkishter ornatýǵa, tereze mańyna jihaz qoimaýǵa jáne balalardy qaraýsyz qaldyrmaýǵa shaqyrdy.
