Қазақстан Тәуелсіздігіне 25 жыл

«Halyqtyq qurylys»: Ulytaý oblysy qurylys qarqyny boiynsha Qazaqstan óńirleri arasynda kósh bastady

«Halyqtyq qurylys»: Ulytaý oblysy qurylys qarqyny boiynsha Qazaqstan óńirleri arasynda kósh bastady
Foto: Vecteezy

Ulytaý oblysy 2026 jyldyń qańtar-qazan ailary aralyǵynda qurylys jumysynyń ósý qarqyny boiynsha Qazaqstan óńirleri arasynda birinshi orynǵa shyqty. Ulttyq statistika biýrosynyń deregine sáikes, óńirdegi qurylys jumysynyń naqty kólem indeksi ótken jyldyń sáikes kezeńimen salystyrǵanda 227,3%-dy qurady. Bul salystyrmaly baǵamen eseptegende qurylys jumysynyń kólemi eki eseden astam artqanyn bildiredi. Al respýblika boiynsha ortasha ósim 13,1% boldy, dep habarlaidy Ult.kz.

Memleket basshysy jariialaǵan Qazaqstannyń infraqurylymyn damytý men jańǵyrtýǵa baǵyttalǵan «Halyqtyq qurylys» bastamasy aiasynda qurylys salasyndaǵy joǵary kórsetkishterdiń mańyzy arta túsýde.

2026 jyldyń on aiynda Ulytaý oblysynda oryndalǵan qurylys jumysynyń kólemi 289,5 mlrd teńgege jetti. Ósý qarqyny boiynsha óńir basqa oblystar men respýblikalyq mańyzy bar qalalardan aitarlyqtai ozyp ketti.

Kóshbasshylar qataryna Qyzylorda oblysy – 130,5%, Atyraý oblysy – 125,7%, Pavlodar oblysy – 123,8% jáne Almaty qalasy – 123,1% kórsetkishpen endi. Bul rette Ulytaý oblysynyń kórsetkishi eń jaqyn básekeles óńirdiń nátijesinen 96,8% tarmaqqa joǵary boldy.

Jalpy, Qazaqstan boiynsha qańtar-qazan ailarynda 9 trln teńgege qurylys jumysy oryndaldy.

Ulytaý oblysyndaǵy oń dinamika qazan aiynda da saqtaldy. Bir aida oryndalǵan qurylys jumysynyń kólemi 24 mlrd teńgeni qurap, ótken jyldyń qazan aiymen salystyrǵanda 29,5%-ǵa ósti. Respýblika boiynsha osy kezeńdegi ortasha ósim 24,2% boldy.

Óndiristik jáne ózge de qurylys jobalarymen qatar, oblysta áleýmettik jáne qalalyq infraqurylymdy damytý jumysy da qarqyn aldy. Jezqazǵan, Sátbaev qalalarynda qoǵamdyq keńistikterdi abattandyrý, mádeniet jáne bilim berý nysandaryn jańǵyrtý jańa demalys jáne sport oryndaryn salý jobalary júzege asyrylýda.

Atap aitqanda, «Qazaqmys korporatsiiasy» JShS Ulytaý oblysynyń ákimdigimen jasalǵan yntymaqtastyq týraly memorandým aiasynda áleýmettik mańyzy bar birqatar jobany qarjylandyrýda. Olardyń qatarynda Keńgir sý qoimasynyń jaǵalaýyn jańǵyrtý, «Jastar» saiabaǵyn abattandyrý, S. Qojamqulov atyndaǵy teatrdy kúrdeli jóndeý, Ulytaý ýniversitetiniń infraqurylymyn damytý jáne Sátbaev qalasyndaǵy Kenshi dańqy alańyn jóndeý bar.

2027 jyly óńirde áleýmettik infraqurylymnyń jańa nysandaryn, sonyń ishinde kópfýnktsionaldy Kongress-ortalyq, fýtbol stadiony men tennis ortalyǵyn salý jumysy bastalmaq.

Osylaisha, Ulytaý oblysyndaǵy qurylys qarqynynyń artýy qalalyq ortany jańartýǵa, áleýmettik infraqurylymdy damytýǵa jáne turǵyndardyń ómir súrý sapasyn jaqsartýǵa baǵyttalǵan jobalardy júzege asyrýmen qatar júrip keledi.