Atyraý halyqaralyq áýejaiynda «Atyraý–Shymkent» baǵyty boiynsha №788 reiske tirkelý kezinde 34 jastaǵy Túrkistan oblysynyń turǵyny tekserý barysynda áýejai qyzmetkerleriniń «zańǵa qaishy zattar bar ma?» degen suraǵyna «tapansha bar» dep jaýap bergen. Osydan keiin jolaýshy reiske jiberilmei qaldy, dep habarlaidy ult.kz.
Oqiǵa 19 mamyr kúni bolǵan. Keiin júrgizilgen tekseris barysynda azamattyń aitqan málimdemesi shyndyqqa janaspaityny anyqtaldy.
"Atalǵan derek boiynsha QR Ákimshilik quqyq buzýshylyq týraly kodeksiniń 434-baby 1-bóligine sáikes ákimshilik hattama toltyrylyp, is Atyraý qalasynyń mamandandyrylǵan ákimshilik sotyna joldandy. Kóliktegi politsiia departamenti azamattardy áýejaida jalǵan aqparat berýden bas tartýǵa jáne qoǵamdyq qaýipsizdik talaptaryn qatań saqtaýǵa shaqyrady", delingen Atyraý stantsiiasyndaǵy kóliktegi politsiia bóliminiń habarlamasynda.
Aita keteiik, buǵan deiin poiyzdarda mas kúiinde júrgen jolaýshylar sany artqany týraly habarlanǵan bolatyn.
