Elimizdiń barlyq mektepterinde 2025–2026 oqý jyly aiaqtalýǵa jaqyn. Biyl oqý jylyn 3,9 millionnan astam oqýshy aiaqtaidy. Onyń ishinde eki júz on bes myńnan astamy – 11-synyp túlekteri, dep habarlaidy ult.kz.
Oqý jylynyń qorytyndysy boiynsha 9-synypty úzdik aiaqtaýǵa úmitkerler sany 31 myńnan astam oqýshyny quraidy. Al 11-synypty úzdik aiaqtaýǵa 18 myń oqýshy úmitker. Búginde elimizdiń bilim berý uiymdarynda 420 myńnan astam pedagog eńbek etýde.
Memleket basshysynyń tapsyrmasymen júzege asyrylyp jatqan «Keleshek mektepteri» ulttyq jobasy aiasynda 217 zamanaýi mektep paidalanýǵa berildi. Onyń 84-i aýyldyq eldi mekenderde ornalasqan. Qazirgi tańda bul mektepterde 220 myńnan astam oqýshy bilim alyp, 16 myńǵa jýyq pedagog jumys isteýde.
Oqý jylynyń aiaqtalýyna orai 25 mamyr kúni elimizdiń barlyq mektepterinde «Bilimim – Otanyma!» taqyrybynda biryńǵai synyp saǵaty ótkiziledi. Synyp saǵattarynda oqý jyly qorytyndylanyp, oqýshylardyń jetistikteri men jarqyn sátteri eske alynady. Sondai-aq «Adal azamat» birtutas tárbie baǵdarlamasynyń negizgi qundylyqtaryna, bilim men ǵylymǵa qurmetti arttyrýǵa, innovatsiialyq oilaýdy damytýǵa Halyqtyq Konstitýtsiiada aiqyndalǵan basty strategiialyq baǵyt retinde erekshe nazar aýdarylady. Oqýshylarǵa jazǵy kanikýl kezinde oqýǵa usynylatyn ádebietter tizimi tanystyrylady.
Oqý-aǵartý ministrligi men jergilikti atqarýshy organdardyń birlesken buiryǵy men qaýlysyna sáikes mektepke deiingi, orta, tehnikalyq jáne kásiptik, orta bilimnen keiingi bilim berý uiymdarynda saltanatty is-sharalardy meiramhanalarda, kafelerde, banket zaldarynda, demalys bazalarynda jáne tabiǵat aiasynda ótkizýge tyiym salynady.
Ata-analardan, zańdy ókilderden jáne bilim alýshylardan saltanatty is-sharalarǵa bailanysty aqsha jinaýǵa, syilyqtar men ózge de materialdyq qundylyqtar talap etýge jol berilmeidi. Al attestattar men diplomdardy saltanatty tabystaý rásimderi tek bilim berý uiymdarynyń qabyrǵasynda uiymdastyrylady.
Birlesken buiryq bilim alýshylar arasynda mektep bitirý is-sharalaryn ótkizý kezindegi qaýipsizdik pen qoǵamdyq quqyqtyq tártipti qamtamasyz etý, sondai-aq bilim berý uiymdarynda «Zań men tártip» ideologiiasyn nyǵaitýdy kózdeidi.
