Soltústik Qazaqstan oblysynyń Petropavl qalasynda jedel jáne shuǵyl meditsinalyq járdem stansasynyń jańa ǵimaraty boi kóteredi. Qurylysqa Infraqurylymdy damytý qorynan 5,9 mlrd teńge bólindi. Onyń 800 mln teńgege jýyǵy meditsinalyq jabdyqtar satyp alýǵa jumsalady, dep habarlaidy ult.kz.
Joba Memleket basshysy Qasym-Jomart Toqaevtyń óńirlerdegi densaýlyq saqtaý nysandaryn salý jáne jańǵyrtý jónindegi tapsyrmasy aiasynda júzege asyrylyp jatyr.
Qazir oblystyq jedel meditsinalyq járdem stansasy Petropavldaǵy 22 brigadanyń jáne aýyldyq jerlerdegi 14 bólimsheniń jumysyn úilestiredi. Olar 510 myńnan astam turǵynǵa qyzmet kórsetedi. Ár brigada táýligine orta eseppen 16 shaqyrtýǵa shyǵady. Jyl saiynǵy shaqyrtýlar sany 100 myńnan asady.
Jańa keshende ne bolady?
Aýmaǵy 1,5 gektar bolatyn keshenniń quramyna tórt qabatty ǵimarat, tsifrlyq dispetcherlik qyzmet, simýliatsiialyq ortalyq, 20 sanitariialyq kólikke arnalǵan jyly garaj, kólik jýý orny jáne jóndeý sheberhanasy kiredi.
Sonymen qatar arnaiy tehnika, meditsinalyq qural-jabdyqtar men dárilik zattardy saqtaýǵa arnalǵan bólmeler qarastyrylady. Preparattardy qajetti temperatýrada ustaý úshin «sýyq tizbek» jabdyqtaryna da erekshe kóńil bólinbek.
Qurylys jumystaryn 2027 jylǵy jeltoqsanda aiaqtaý josparlanǵan.
Jańa stansa iske qosylǵan soń shuǵyl shaqyrtýlarǵa jetý ýaqytyn qysqartyp, meditsinalyq kómektiń jedeldigin arttyrý kózdelip otyr. Al tsifrlyq dispetcherlik bólme qońyraýlardy jyldam óńdep, shaqyrtýlardyń basymdyǵyn anyqtaýǵa jáne brigadalardy tiimdi baǵyttaýǵa múmkindik beredi.
Aita keteiik, biyl Qazaqstanda 50-ge jýyq densaýlyq saqtaý nysanyn salýǵa 108 mlrd teńge bólingen. Olardyń qatarynda Qyzylorda men Óskemendegi kópsalaly aýrýhanalar, Atyraý oblysyndaǵy emhanalar, Beskól men Taldyqorǵandaǵy ambýlatoriialyq keshender bar. Óskemende zamanaýi Gematologiia ortalyǵy da paidalanýǵa berildi.
