Tanymal óner ieleri Qýanysh Qurmanbaev pen Qarlyǵash Sultansha "Tańsholpan" baǵdarlamasyna bergen suhbatynda otbasylyq ómiri men shyǵarmashylyq joldary týraly syr shertti. Kompozitor ózin ánshilikke baýlyp, keiin ustazdyq jolǵa túsýine de sebepshi bolǵan jubaiy ekenin aitty, dep habarlaidy ult.kz.
20 jyldan astam ýaqyt tatý-tátti ǵumyr keship kele jatqan ónerli jup búginde úsh qyz ben úsh ul tárbielep otyr. Baǵdarlama barysynda erli-zaiyptylar alǵash qalai tanysqandaryn jáne óner jolyndaǵy jetistikterine qalai jetkenderin áńgimeledi.
Qarlyǵash Sultanshanyń aitýynsha, ekeýiniń tanystyǵy án jazdyrýdan bastalǵan. Sol kezde ol Qýanyshqa kompozitor retinde jolyǵyp, "aǵai" dep qurmet kórsetken eken.
"Qýanyshqa "aǵai" dep án jazýǵa baryp, tanysqanbyz. Sol kezdegi aǵai áli kúnge deiin ónerde "aǵaiym" bolyp kele jatyr", – dedi Qarlyǵash Sultansha.
Al Qýanysh Qurmanbaev óner jolynda 26 jyldan beri eńbek etip kele jatqanyn aitty. Onyń sózinshe, bastapqyda ol án aitýdan góri, án óńdeýmen ainalysqan. Keiin jubaiy onyń boiyndaǵy qabiletti baiqap, sahnaǵa shyǵýyna túrtki bolǵan.
"Men negizi basynda tek ánderdi óńdeýmen ainalysatynmyn. Keiin Qarlyǵash meni ánshi qylǵan. Óziń sahnaǵa shyq dep ideia berdi. Men oqymaǵanmyn, nota tanymaimyn. Biraq Qudaidyń bergen daryny bar. Sol qabiletimdi damyta berdim", – dedi óner iesi.
Kompozitordyń aitýynsha, Qarlyǵash Sultansha onyń tek ánshilik qyryn ashyp qoimai, keiingi jyldary ustazdyqpen ainalysýyna da yqpal etken.
Erli-zaiyptylar 2023 jyly Amerikaǵa baryp, bilimderin jetildirgen. Sol sapar barysynda shaǵyn dýet keshin ótkizip, shyǵarmashylyqqa qatysty jańa josparlar qurǵan.
"Ónerde eńbek etip kele jatqanyma 26 jyl boldy. Qýanysh Qurmanbaev degen kompozitor, aranjirovshik jigitti ánshi qylǵan Qarlyǵash negizi. Biz 2023 jyly Amerikaǵa baryp, bilimimizdi arttyryp, sol jerde dýettiń kishigirim keshin berdik. Sol kezde Qarlyǵash ideia tastady. Ónerde ózin, stilin tappai júrgen jas ánshilerge jolyn kórsetetin ýaqytyń keldi. Osy boiynsha qyzmet jasaiyq dep, meni ustazdyqqa súirep alyp keldi", – dep kúldi ánshi.
Jubaiynyń bul usynysyn qoldaǵan Qýanysh Qurmanbaev búginde jas ónerpazdarǵa baǵyt-baǵdar berip, shákirt tárbielep júr. Onyń aitýynsha, osy ýaqytqa deiin 30-dan astam jas ánshige tálim bergen. Al Qarlyǵash Sultansha joldasynyń ustazdyq qabiletin kópshilikke tanytýǵa da ózi bastamashy bolǵanyn jasyrmady.
"Sen aitpasań, seniń bul jolda ekenińdi eshkim bilmeidi dep Instagram-ǵa birden túsirip saldyq", – dedi ol.
Osylaisha, Qýanysh Qurmanbaev ánshilikke de, ustazdyqqa da kelýine jubaiy Qarlyǵash Sultanshanyń úlken yqpal etkenin jetkizdi. Ónerli jup búginde otbasylyq ómir men shyǵarmashylyqty qatar alyp júrip, jas talanttardyń ónerge qadam basýyna kómektesip keledi.
"Qýanysh pen Qarlyǵash" dýeti
"Qýanysh pen Qarlyǵash" – qazaq estradasyndaǵy tanymal otbasylyq dýet. Ónerli juptyń quramynda kompozitor, án óńdeýshi Qýanysh Qurmanbaev pen ánshi Qarlyǵash Sultansha bar. Olar "Syńarym", "Sen barda", "Anama" sekildi ánderimen kópshilikke tanylǵan.
Qýanysh Qurmanbaev án jazýmen jáne óńdeýmen ainalysyp qana qoimai, jas ónerpazdardy tárbieleýge de úles qosyp keledi. Onyń jetekshiligimen ashylǵan óner stýdiiasynda balalar án aityp, túrli shyǵarmashylyq baiqaýlarǵa qatysqan.
Erli-zaiyptylar 20 jyldan astam ýaqyt birge ómir súrip, búginde alty bala tárbielep otyr. Óner men otbasylyq ómirdi qatar alyp júrgen jup telebaǵdarlamalarda shyǵarmashylyq joldary men shańyraqtaǵy qyzyqty oqiǵalaryn jii bólisedi.
