Qazaqstanda Stadler kompaniiasy shyǵarǵan jańa jolaýshylar vagondary iske qosylady. Alǵashqy poiyzdar Astanadan Almaty men Semeige qatynaidy. Jańa vagondarǵa biletter satylymy 5 qarashada bastaldy, dep habarlaidy ult.kz.
«Qazaqstan temir joly» málimetinshe, 11 qarashada Astanadan Almatyǵa, al 13 qarashada Semeige alǵashqy poiyzdar jolǵa shyǵady.
Jańa vagondarmen №3/4 «Nurly jol – Almaty-2» jáne №153/154 «Nurly jol – Semei» poiyzdary qatynaidy. Biletterdi QTJ-nyń resmi saitynan nemese temirjol vokzaldaryndaǵy kassalardan satyp alýǵa bolady.
Vagondar Stadler Kazakhstan zaýytynda elimizdiń klimattyq erekshelikteri men jolaýshylar tasymalyna qoiylatyn zamanaýi talaptardy eskere otyryp jasalǵan.
Kýpe vagondary 40 jolaýshyǵa, al platskart vagondary 56 adamǵa arnalǵan.
Jańa vagondarda:
- klimat-baqylaý júiesi;
- jeke jaryqtandyrý quraldary;
- 220 V elektr rozetkalary;
- USB jáne USB-C porttary;
- beinebaqylaý júiesi qarastyrylǵan.
Sondai-aq júrip-turýy shekteýli jolaýshylarǵa arnaiy jaǵdai jasalǵan. Poiyz quramyna ystyq tamaq, sýsyndar men jeńil taǵamdar satylatyn býfet vagondary da qosylady.
Jolaýshylar vagonyn jańartý Memleket basshysynyń tapsyrmasy aiasynda júzege asyrylyp jatyr. Kelisimshart boiynsha 2030 jylǵa deiin Qazaqstanǵa 557 jańa vagon kezeń-kezeńimen jetkizilip, olarǵa servistik qyzmet kórsetiledi.
