Memleket basshysy Qasym-Jomart Toqaevtyń tapsyrmalaryn júzege asyrý aiasynda elimizdiń óńirlerinde kólik jelisin jańǵyrtý, jańa oqýshy oryndaryn ashý jáne mektepke deiingi bilim berýge qoljetimdilikti arttyrý boiynsha júieli jumys jalǵasyp keledi, dep habarlaidy ult.kz.
Ótken aptada kólik jáne bilim berý boiynsha paidalanýǵa berilgen nysandar:
Temirjol infraqurylymy
Abai oblysynda temirjol infraqurylymyn jańǵyrtý baǵdarlamasy aiasynda Shar, Úshbiik, Jarma jáne Jalańashkól stansalaryndaǵy jańartylǵan tórt temirjol vokzaly paidalanýǵa berildi. Nysandar kúrdeli rekonstrýktsiiadan ótti. Tozyǵy jetken qurylystar buzylyp, qosymsha qabattar salyndy. Bul keshenderdiń aýmaǵyn keńeitýge jańa perrondar men platformalar salýǵa, sondai-aq kútý zaldaryn qaita jabdyqtap, qozǵalys múmkindigi shekteýli azamattar úshin kedergisiz orta qurýǵa múmkindik berdi.
Aqtóbe oblysynda 1905 jyly salynǵan Jem temirjol vokzaly rekonstrýktsiiadan keiin qaita ashyldy. Keshenniń jalpy aýmaǵy 387,5 sharshy metrden 421,2 sharshy metrge deiin ulǵaityldy. Shatyry men qasbeti jańartylyp, ishki bólmeleri qaita jabdyqtaldy, injenerlik jelileri jańǵyrtyldy. Perron rekonstrýktsiialanyp, irgeles aýmaq abattandyryldy. Kútý zaldary jańa jihazdarmen jáne zamanaýi jabdyqtarmen qamtamasyz etildi.
Bilim berý
Aqtóbe oblysynda oqý jylynyń bastalýyna orai jeti jańa mektep ashyldy: Aqtóbe qalasynda – úsh, Temir aýdanynda – eki, Muǵaljar jáne Mártók aýdandarynda bir-birden. Ǵimarattar pándik kabinetter, sport zaldary, tsifrlyq jabdyqtar jáne qaýipsizdik júielerimen jabdyqtalǵan. Jalpy óńirdiń 449 mektebinde oqý jylyn 194 myńnan astam bala bastady, onyń ishinde 20 myńnan astamy – birinshi synyp oqýshylary.
Almaty oblysynda «Keleshek mektepteri» ulttyq jobasy aiasynda 4,2 myń orynǵa arnalǵan bes jańa mektep ashyldy, taǵy 10 nysan kúrdeli jóndeýden keiin paidalanýǵa berildi. Bilim berý uiymdary STEM zerthanalary, robototehnika kabinetteri, sport zaldary jáne qaýipsizdik júielerimen jabdyqtalyp, kedergisiz orta qalyptastyryldy.
Túrkistan oblysynda toǵyz jańa mektep pen qosymsha ǵimarat paidalanýǵa berildi. Budan bólek, óńirde kúrdeli jóndeýdi qajet etetin 115 mektepti jańartý jáne jańǵyrtý jumystary júrgizilýde. Túrkistan oblysynda 50 myńnan astam bala birinshi synypqa bardy.
Ulytaý oblysynyń Myńadyr aýylynda Bilim berý infraqurylymyn qoldaý qorynyń qarajaty esebinen (zańsyz iemdenilgen aktivterdi qaitarý esebinen) 80 oryndyq jańa mektep ashyldy. Ǵimaratta 18 synyp, robototehnika kabineti, sport zaly, sondai-aq fýtbol jáne basketbol alańdary bar.
Almatyda 120 jáne 160 oryndyq eki jańa balabaqsha ashyldy. Ondaǵy toptardyń árqaisysy interaktivti taqtalar jáne mobildi tsifrlyq qurylǵylarmen jabdyqtalǵan. Ǵimarattarda sport jáne mýzyka zaldary, qazaq tili kabinetteri, psiholog kabineti jáne shyǵarmashylyqpen ainalysýǵa arnalǵan keńistikter qarastyrylǵan.
