QR DSM Taýarlar men kórsetiletin qyzmetterdiń sapasyn jáne qaýipsizdigin baqylaý komitetiniń resmi ókili Erjan Baitanaev el azamattary qai shet memleketten koronavirýs juqtyryp kelip jatqanyn aitty, dep habarlaidy QazAqparat.
«QR Bas memlekettik sanitariialyq dárigeriniń qaýlysyna sáikes, 2020 jyldyń 6 qazanynan bastap elimizdiń memlekettik shekarasynyń avtomobil ótkizý pýnktteri arqyly 196 myń adam ótken. 364 adamda oń nátijesi bar koronavirýs infektsiiasy anyqtaldy. Halyqaralyq áýe reisterimen 60 953 jolaýshy ushyp keldi. 8 827 adamnan test aldyndy. Oń nátijemen 48 adam anyqtaldy. Atap aitqanda, Túrkiiadan - 16, Mysyrdan - 18, BAÁ-den - 5, Belarýsten - 7 jáne Reseiden - 2 adam», - dedi ol Ortalyq kommýnikatsiialar qyzmetindegi baspasóz máslihatynda.
Sonymen qatar ol QR aýmaǵynda turýǵa ruqsaty bar sheteldikter, olardyń otbasy músheleri, QR azamattarynyń otbasy músheleri bolyp tabylatyn sheteldikter úshin elimizdiń shekarasyn kesip ótý tártibine ózgerister engizildi. Endi bul azamattar memlekettik shekarany 90 táýlikte bir ret qana kesip óte alady.
«Sondai-aq 2021 jyldyń 1 mamyryna deiin 57 eldiń azamaty úshin vizasyz rejimdi toqtatýǵa májbúr boldyq. 2021 jyldyń 1 qańtaryna deiin Qytai men Úndistannan keletin tranzittik jolaýshylardyń QR aýmaǵynda 72 saǵat vizasyz júrý jeńildigi toqtaldy. Ýkraina, BAÁ, Germaniia, Belarýs, Túrkiiamen áýe reisteriniń sany qysqardy. Qazaqstan aýmaǵyna áýe reisterimen kelgen barlyq adamda, onyń ishinde Qazaqstan azamattarynda, sondai-aq ekijaqty halyqaralyq júk tasymalyn júzege asyratyn júrgizýshilerde PTR testileý týraly anyqtamasy bolýy tiis degen sheshim shyǵaryldy», dedi ol.
