Ál-Farabi atyndaǵy Qazaq ulttyq ýniversitetinde birinshi kýrs stýdentiniń jataqhanada qaza tabýyna bailanysty prorektor men dekan qyzmetinen bosatyldy. Sonymen qatar oqiǵa bolǵan kúni kezekshilikte bolǵan qyzmetkerler jumystan shettetildi. Bul týraly ýniversitettiń baspasóz qyzmeti málimdedi, dep habarlaidy ult.kz.
Ýniversitet basshylyǵy jataqhanadaǵy qaýipsizdik pen tártipti qamtamasyz etý mindetterin tiisti deńgeide oryndamaǵany úshin Basqarma múshesi – áleýmettik damý jónindegi prorektor men Geografiia jáne tabiǵatty paidalaný fakýltetiniń dekanyn qyzmetinen bosatý týraly sheshim qabyldaǵan.
Al oqiǵa bolǵan kúni kezekshilikte bolǵan qyzmetkerler jumystan shettetilip, olardyń áreketterine quqyqtyq baǵa berilip jatyr.
Ýniversitet qaitys bolǵan stýdenttiń otbasyna kóńil aityp, jaqyndarymen turaqty bailanysta ekenin jáne qajetti kómek kórsetýge daiyn ekenin jetkizdi.
Qazir barlyq jataqhanada keshki baqylaý kúsheitilip, stýdentterdiń qaýipsizdigin qamtamasyz etýge arnalǵan qosymsha sharalar qolǵa alynǵan. Sondai-aq olarǵa kásibi psihologiialyq kómek kórsetý jumystary uiymdastyrylǵan.
Ýniversitet ókilderi tergeý organdaryna tolyq qoldaý kórsetip jatqanyn jáne istiń ashyq ári obektivti tergelýine múddeli ekenin málimdedi.
Sonymen qatar Qylmystyq-protsestik kodekstiń 201-babyna sáikes, tergeý qupiiasyna jatatyn ózge málimetterdi jariialai almaitynyn aitty. Ýniversitet oqiǵaǵa qatysty jańa aqparatty qoǵam men marqumnyń jaqyndaryna ýaqtyly jetkizýge ýáde berdi.