Kaspii teńizindegi oqý-jattyǵý kezinde qaza bolǵan 14 áskeri qyzmetshiniń arasynda bolǵan oqiǵadan aman qalǵan úsh adamnyń biri – Nikita Ýdalov. Onyń aǵasy áleýmettik jelide otbasy atynan úndeý jasap, Nikitanyń qazirgi jaǵdaiy týraly aitty, dep habarlaidy ult.kz.
Onyń sózinshe, Nikita qaiǵyly jaǵdai kezinde ózi baǵdar alyp, jaǵaǵa deiin jetip, aman qalǵan.
«Nikita óz ómirin ózi saqtap qaldy. Qaiǵyly jaǵdai kezinde ol jaǵdaidy tez baǵdarlap, jaǵaǵa deiin jetip, aman qaldy. Qazir kópshilik onyń qalai aman qalǵanyn, naqty ne bolǵanyn bilgisi keledi. Alaida ázirge Nikita bul týraly aitýǵa daiyn emes», – dep jazdy aǵasy.
Ol Nikitanyń qazir bolǵan jaǵdai týraly kópshilikke aityp, suhbat berýge daiyn emestigin atap ótti.
«Ol bir kúnde umytý múmkin emes jaǵdaidy bastan ótkerdi. Qazir ol kópshilik aldyna shyqqysy kelmeidi, suhbat berýge de, bolǵan oqiǵanyń egjei-tegjeiin aitýǵa da daiyn emes. Osyny qurmetteýlerińizdi ótinemiz», – delingen úndeýde.
Nikitanyń aǵasy áleýmettik jeli qoldanýshylarynan onyń atynan túrli aqparat taratpaýdy jáne tekserilmegen málimetterge senbeýdi surady.
«Ótinemiz, onyń atynan túrli oqiǵa oilap shyǵarmańyzdar. Tekserilmegen aqparatty taratpańyzdar. Onyń basynan ótken jaǵdaidy sensatsiiaǵa ainaldyrmańyzdar», – dedi ol.
Sondai-aq otbasy úshin qazir eń mańyzdysy – Nikitanyń óz-ózine kelýi ekenin jetkizdi.
Kaspiidegi qaiǵyly oqiǵadan aman qalǵan úsh sarbaz týraly ne belgili?
24 qyrkúiekte Kaspii teńizindegi áskeri oqý-jattyǵý kezinde qaiǵyly jaǵdai bolyp, 14 áskeri qyzmetshi qaza tapty. Oqiǵadan úsh sarbaz aman qaldy.
Beket Qýandyq – Atyraý oblysynyń týmasy
Atyraý oblysy Mahambet aýdanynyń turǵyny Beket Qýandyq áskeri qyzmetke 2025 jyly attanǵan.
Týystarynyń aitýynsha, teńiz aǵysy áskeri qyzmetshilerdi alyp ketken kezde Beket jaǵaǵa óz kúshimen júzip shyqqan. Ol aýrýhanaǵa jatqyzylmaǵan, qazir ózin jaqsy sezinedi jáne ózdiginen júrip-tura alady. Qazir oǵan psihologiialyq kómek kórsetilip jatyr.
Aqjol Temirhan – Mańǵystaý oblysynyń týmasy
Ekinshi aman qalǵan áskeri qyzmetshi – Mańǵystaý oblysynyń turǵyny Aqjol Temirhan.
Ol oqiǵadan keiin aýyr jaǵdaida aýrýhanaǵa jetkizilip, jansaqtaý bólimine jatqyzylǵan. Kelesi kúni esin jiyp, jaǵdaiy turaqtanǵan. Qazir dárigerlerdiń baqylaýynda.
Nikita Ýdalov – Oral qalasynyń týmasy
Úshinshi aman qalǵan áskeri qyzmetshi – Batys Qazaqstan oblysynyń týmasy Nikita Ýdalov.
Qorǵanys ministrliginiń málimetinshe, onyń jaǵdaiy jaqsy jáne dárigerlerdiń baqylaýynda. Nikitanyń týystary da onyń ómirine qaýip joq ekenin habarlaǵan.
Nikitanyń aǵasy keiin otbasy atynan úndeý jasap, sarbazdyń qazir suhbat berýge jáne bolǵan jaǵdaidy egjei-tegjeili aitýǵa daiyn emes ekenin jetkizdi. Otbasy jurtshylyqtan onyń jeke keńistigin qurmetteýdi jáne tekserilmegen aqparat taratpaýdy surady.
Osylaisha, 24 qyrkúiektegi qaiǵyly oqiǵadan keiin 17 áskeri qyzmetshiniń úsheýi aman qalyp, 14-i qaza tapty. Qaiǵyly jaǵdaiǵa qatysty tergeý jalǵasyp jatyr.
