SARS-CoV-2 koronavirýsyn pandemiia bastalǵaly beri álemde 39 million adam juqtyrǵan. Onyń 1,09 milliony kóz jumsa, 29 million adam indetten jazylyp shyqty, dep habarlaidy QazAqparat Deutsche Welle aqparat kózine silteme jasap.
Belgiiada SARS-CoV-2 juqtyrýdyń táýliktik ósiminiń antirekordy tirkeldi. Juqtyrǵandardyń sany – 7481.
100 myń adamǵa eseptegende koronavirýsqa shaldyqqandar sany sońǵy eki aptada 494 adamdy qurady (el astanasy Briýsselde - 880). Pandemiia bastalǵaly Belgiiada infektsiiany juqtyrǵan azamattardyń jalpy sany 181,5 myńǵa jetken.
Grýziianyń batysyndaǵy Tbilisi men Imeretide 16 qazannan bastap koronavirýspen kúrestiń jańa sharalary kúshine enedi. Atap aitqanda, eldegi meiramhanalar men oiyn-saýyq mekemeleri saǵat 22.00-den keiin jumysyn toqtatady. Al memlekettik jáne jeke kásiporyndarǵa jumysty qashyqtan júrgizýge keńes berilip jatyr. Keiingi táýlikte Grýziiada koronavirýsty juqtyrýdyń rekordty kórsetkishi tirkelip, indet bir kúnde 919 adamdy sharpyǵan. Jalpy elde koronavirýspen aýyrǵandardyń sany 14,4 myńǵa jetti.
Polshada koronavirýsty juqtyrýdyń táýliktik ósimi 8 myńǵa jetti (sońǵy táýlikte 8099 adam). Jańa jaǵdailardyń kóbi el astanasy Varshavanyń mańaiyndaǵy aimaqtarda tirkelýde. Jalpy Polshada indetti 149,9 myń adam juqtyrǵan.
Avtriiada bir kúnde 1552 adam tirkeldi. Osylaisha juqtyrǵandardyń jalpy sany 60 224-ti qurady. Qazir virýstyń jańa túrinen 664 patsient emdelip jatsa, olardyń 119-y - jansaqtaý bóliminde.
Chehiiada da koronavirýsqa shaldyǵýdyń táýliktik ósimi jaǵynan antirekord tirkeldi. Sońǵy 24 saǵattyń ishinde bul elde koronavirýs infektsiiasy 9544 adamnan anyqtalǵan. Birneshe kún buryn ǵana ósim 8325 jaǵdaiǵa jetken edi. Jalpy Chehiiada pandemiia bastalǵaly indet 139 290 adamdy qursaýyna alǵan . Bir táýlikte virýstyń jańa túrinen 35 adam kóz jumyp, jalpy qaitys bolǵandardyń sany 1172 boldy.
Ýkrainada 15 qazanda, iaǵni beisenbi kúni tańerteń SARS-CoV-2 virýsyn juqtyrýdyń 5 062 jańa jaǵdaiy tirkeldi. Ol eldegi Ulttyq qaýipsizdik jáne qorǵanys keńesiniń Koronavirýs epidemiiasynyń taralýyna monitoring júiesiniń saitynda buryn juqtyrǵandardyń 73-i qaitys bolǵany habarlanǵan. Odan bir kún buryn, iaǵni 14 qazanda infektsiia 5590 adamnan anyqtalǵan edi. Pandemiia bastalǵannan beri ondaǵy juqtyrǵandardyń sany beisenbi kúni tańerteńgi statistika boiynsha 281 239 adamdy quraǵan. COVID-19 virýsynan 5 302 adam qaitys bolǵan.
Germaniiada juqtyrǵandar sanynyń kún saiyn ósip bara jatqany habarlanyp otyr. Robert Koh institýtynyń málimetteri boiynsha, sońǵy táýliktegi testiler 6638 adamnyń virýs juqtyrǵanyn kórsetken. Bul - elde epidemiia bastalǵannan bergi eń joǵary kórsetkish. Buǵan deiin koronavirýstyń jańa túrin juqtyrýdyń eń kóp jańa jaǵdaiy 28 naýryzda (6294) tirkelgen bolatyn. Jalpy Germaniiada epidemiia bastalǵannan beri 341 223 adamnan SARS-CoV-2 infektsiiasy anyqtalǵan. 9710 patsient qaitys bolǵan. Worldometer portalynyń habarlaýynsha, barlyǵy 284 600 adam saýyǵyp ketken.
Portýgaliia jańa tiptegi virýsty juqtyrǵandar sanynyń artýyna bailanysty tótenshe jaǵdai rejimin engizip jatyr. Qaýlynyń kúshinde turatyn merzimi 15 kúnge eseptelgen. Lissabonda ótken Úkimet otyrysynda premer-ministr Antonio Koshta aitqandai, qaýly bilikke azamattardyń júrýine jáne qoǵamdyq ómirde shekteý qoiýǵa múmkindik beredi. Kópshilik jinalystarǵa bes adamnan, al jeke keshterde 50-den artyq adam jinalmaýy kerek. Qaýlyny áli de eldegi parlament - Respýblika keńesi maquldaýy kerek. 14 qazannyń ózinde Portýgaliiada virýs juqtyrǵandardyń sany 2072-ge jetti. Bul - pandemiia bastalǵannan bergi eń joǵary kórsetkish.
AQSh-ta koronavirýsqa shaldyqqandar sany 53 609 adam jetip, olardyń jalpy sany 7,95 mln adamǵa jaqyndady. Jalpy atalmysh elde koronavirýstan kóz jumǵandardyń sany 216 650 adamǵa jetken. Bul – pandemiia bastalǵaly New York Times basylymynyń júrgizip kele jatqan sanaǵy.
AQSh prezidenti Donald Tramptyń kenje uly - 14 jastaǵy Barron koronavirýs juqtyryp aldy. Bul týraly onyń anasy, AQSh-tyń birinshi hanymy Melaniia habarlady. Onyń aitýynsha, testten ótkennen keiin ulynan virýstyń jańa tipi anyqtalǵan. Alaida ulynyń boiynda aýrýdyń eshqandai belgisi baiqalmaǵan. «Baqytymyzǵa orai, ol myǵym jasóspirim» dep qosty Aq úi basshysynyń áieli.
Braziliiada ótken táýlikte taǵy 749 adam koronavirýstan qaitys boldy. Eldiń Densaýlyq saqtaý ministrliginiń málimetterinshe, aýrý juqtyrǵan adamdardyń sany sońǵy táýlikte 27235 adamǵa kóbeiip, jalpy juqtyrǵandardyń sany 5 140 863-ke jetken. Braziliiada koronavirýs infektsiiasynyń saldarynan barlyǵy 151 747 adam qaitys bolǵan. Worldometer málimeti boiynsha Braziliia koronavirýstyń ólimi boiynsha álemde AQSh-tan keiin ekinshi, infektsiialar sany boiynsha AQSh pen Úndistannan keiingi úshinshi orynda tur.
