Қазақстан Тәуелсіздігіне 25 жыл

"Biri qulap, biri sózin umytty": Qazaq ánshileriniń sahnadaǵy yńǵaisyz sátteri

"Biri qulap, biri sózin umytty": Qazaq ánshileriniń sahnadaǵy yńǵaisyz sátteri
Foto-kollaj: ult.kz

Kórermen aldynda óner kórsetý árdaiym oidaǵydai óte bermeidi. Keide ánshiler ánniń sózin umytyp qalsa, endi biri sahnada súrinip, kútpegen jaǵdaiǵa tap bolady. Qazaq estradasynyń tanymal ókilderi de mundai sátterdi bastan ótkergen. Ult.kz ánshilerdiń ózderi suhbattarynda aityp bergen sahnadaǵy bes qyzyqty oqiǵany jinaqtady.

1. Nurjan Kermenbaev Prezident aldynda ánniń sózin umytyp qalǵan

"Arnaý" toby arqyly tanylǵan Nurjan Kermenbaev burynǵy prezident Nursultan Nazarbaevtyń aldynda óner kórsetkende bolǵan yńǵaisyz jaǵdaidy eske alǵan. Ánshi bul oqiǵany toptaǵy áriptesi Saltanat Baqaevamen birge Instagram jelisinde bólisken.

Olardyń aitýynsha, birde "Almaty kontsert" ujymynyń uiymdastyrýymen birneshe ónerpaz Astanaǵa shaqyrylǵan. Sol keshte "Arnaý" tobyna prezident unatatyn "Aqtamaq" jáne "Ápitók" ánderin oryndaý tapsyrylǵan. Alaida Nurjan men Saltanat bul shyǵarmalardyń sózin burynnan bilmegendikten, túni boiy jattaýǵa májbúr bolǵan. Tipti Astanaǵa ushyp bara jatqanda da án mátinderin qaitalaǵan. Kesh bastalǵanda ekeýi aldymen óz repertýaryndaǵy ánderdi oryndaǵan. Biraq kezek jańadan jattaǵan shyǵarmalarǵa kelgende, ekeýi de sózin umytyp qalǵan.

"Ándi basynan aiaǵyna deiin "na-na-na" dep aityp shyqtyq. Eń qyzyǵy, eshkim kúlmedi", – dep eske alǵan óner ieleri.

Nurjan men Saltanat osy oqiǵadan keiin "Arnaý" toby bolyp prezidenttiń aldynda qaita óner kórsetpegenderin ázilmen jetkizgen.

2. Mádina Sádýaqasovanyń bishisi sahnada yńǵaisyz jaǵdaiǵa qalǵan

Tanymal ánshi Mádina Sádýaqasova kontsert kezinde kórermendi kúlkige qaryq qylǵan oqiǵany 7 arnaǵa bergen suhbatynda baiandaǵan.

Ánshiniń aitýynsha, ol sahnada án oryndap turǵan kezde zaldaǵy adamdar aiaq astynan dý kúlgen. Bastapqyda Mádina kórermenderdiń ne sebepti kúlgenin túsinbegen. Keiin artyna burylyp qaraǵanda ǵana jaǵdaidyń mán-jaiyn ańǵarǵan. Sóitse, ánshiniń artynda bilep júrgen jigittiń sahnalyq kiimi jyrtylyp ketken eken. Eń qyzyǵy, bishi jigit eshteńe bolmaǵandai óner kórsetýin jalǵastyra bergen.

"Artyma qarap qalsam, bishi jigittiń shalbary ortadan qaq bólinip jyrtylyp qapty. Kombinezon. Ol baiǵus bilep jatyr", – dep eske alǵan ánshi.

Mádina sol sáttiń teledidardan qalai kórsetilgenin de bilmeitinin aitqan. Kútpegen jaǵdai onyń sahnalyq qoiylymdarǵa degen kózqarasyna áser etken. Ánshi osy oqiǵadan keiin kontsertterde kúrdeli shoý uiymdastyrýǵa saqtyqpen qarai bastaǵanyn jetkizgen. Ol mundai sátterde artyq qylamyn dep, tyrtyq qylyp alýdan qorqatynyn jasyrmaǵan.

3. Aqbota-Nur án aityp turyp kúlkisin toqtata almaǵan

Ánshi ári aktrisa Aqbota-Nur Seiitmaǵambet bir kontsertte Qýandyq Rahymmen án oryndap turyp, kútpegen jaǵdaiǵa tap bolǵan. Eki ónerpaz sahnada "Altynym" ánin shyrqaǵan kezde Aqbota kenet kúlip jibergen. Onyń ándi jalǵastyra almai, qaita-qaita kúlgen sáti áleýmettik jelide taraǵan. Beinejazbany kórgen qoldanýshylar ánshiniń áreketin túrlishe baǵalap, synǵa alǵan.

Keiin Aqbota Stan.kz basylymyna bergen suhbatynda oqiǵanyń sebebin túsindirgen. Onyń aitýynsha, sol kezde ol balasymen birge gastroldik saparda júrip aýyryp qalǵan. Qýandyq Rahym ánderdi jandy daýysta oryndaityndyqtan, Aqbota da onymen birge jandy daýysta án salǵan. Alaida sahnada tamaǵy aýyryp, jótel qysyp, án aitýy qiyndaǵan.

"Sahnada án aityp jatqanymda jótel qysty. Sosyn qaqyryq kele bastady. Uiat bolsa da aitaiyn, qaqyryqty ne ári, ne beri ótkize almai qaldym. Sol úshin kúlip jiberdim", – degen ánshi.

Ol osy jaǵdaiǵa bailanysty kópshiliktiń ózin durys túsinbegenin aityp, Qýandyq Rahymmen aralarynda tek dostyq jáne áriptestik bailanys bar ekenin de túsindirgen.

4. Roza Rymbaeva sahnada shalqasynan qulap túsken

Qazaqstannyń Halyq ártisi Roza Rymbaeva da sahnadaǵy kútpegen oqiǵalardyń birin "Alǵashqy" baǵdarlamasynda eske alǵan. Ánshiniń aitýynsha, kontsertterdiń birinde ol án oryndap júrip, artqa qarai qozǵalǵan. Alaida sahnada turǵan mýzykalyq qurylǵyny baiqamai qalǵan. Sonyń saldarynan ánshi súrinip, shalqasynan qulap túsken. Roza Rymbaeva bul oqiǵany keiin ázilmen eske alyp, sahnada salto jasaǵanyn aitqan.

"Sahnada qulaǵanmyn. Sahnada neshe túrli tehnika turady ǵoi. Men sahnada kórermenniń aldynda án aityp, artqa qarai kele jatyp, jáshikti kórmei qalǵanmyn, salto jasadym ǵoi", – degen óner iesi.

Osy oqiǵany mýzykant Murat Bisenǵaliev te eske alǵan. Onyń aitýynsha, kontsert Respýblikalyq saraida ótip, Roza Rymbaeva sahna ortasynda án aityp, bilep júrgen. Ánshi qulaǵan sátte mýzykanttar onyń jaraqat alyp qalýynan qorqyp, qatty shoshyǵan. Biraq Roza Rymbaeva birden ornynan turyp, ázil aityp, kontsertti eshteńe bolmaǵandai jalǵastyrǵan. Óner iesiniń sol kezdegi sabyrlylyǵy men tapqyrlyǵy áriptesteriniń esinde qalǵan.

5. Serik Ibragimov jeke kontsertinde óz ániniń sózin umytyp qalǵan

Qazaq estradasynyń ánshisi Serik Ibragimov te jandy daýysta óner kórsetý kezinde yńǵaisyz jaǵdaiǵa tap bolǵan.

2019 jyldyń qańtarynda onyń kontsertte án sózin umytyp qalǵan beinejazbasy áleýmettik jelide taraǵan. Oqiǵa ánshi "Joq deme" shyǵarmasyn oryndaýǵa shyqqanda bolǵan. Serik ánniń basyndaǵy sózderdi esine túsire almai, biraz ýaqyt kidirip qalǵan. Keiin ol kórermenderden ándi qaita bastaýdy suraǵan. Osy sátte óner iesi jandy daýysta án aityp turǵanyn da atap ótken. Alaida artynsha shyǵarmanyń jańa ekenin jáne mátinin tolyq meńgerip úlgermegenin moiyndaǵan.

"Jańa án bolǵannan keiin, sózi sál esime túspei turǵany. Bas jaǵy..." – dep túsindirgen ánshi NTK arnasynyń "Reviý" baǵdarlamasynda.

Bul jaǵdai jeli qoldanýshylary arasynda qyzý talqylanǵan. Biri ánshini kontsertke jetkilikti daiyndalmaǵany úshin synasa, endi biri onyń qateligin jasyrmai moiyndaǵanyn qoldaǵan. Serik Ibragimovtiń sahnadaǵy bul sáti jandy daýysta óner kórsetý kezinde kútpegen jaǵdailardyń bolatynyn kórsetken.

Sahnadaǵy mundai oqiǵalar tanymal ónerpazdardyń da kútpegen jaǵdaiǵa tap bolatynyn kórsetedi. Biri ánniń sózin umytyp, endi biri sahnadaǵy qurylǵyǵa súrinse, keibirine densaýlyǵy kedergi bolǵan. Ánshilerdiń keiin bul sátterdi ashyq aityp, tipti ázilge ainaldyrýy olardyń sahna syrtyndaǵy bolmysyn da tanytady. Al kezinde yńǵaisyz kóringen jaǵdailar jyldar óte óner adamdarynyń umytylmas esteligine ainalǵan.