Қазақстан Тәуелсіздігіне 25 жыл

"بٸرٸ قۇلاپ, بٸرٸ سٶزٸن ۇمىتتى": قازاق ەنشٸلەرٸنٸڭ ساحناداعى ىڭعايسىز سەتتەرٸ

"بٸرٸ قۇلاپ, بٸرٸ سٶزٸن ۇمىتتى": قازاق ەنشٸلەرٸنٸڭ ساحناداعى ىڭعايسىز سەتتەرٸ
فوتو-كوللاج: ult.kz

كٶرەرمەن الدىندا ٶنەر كٶرسەتۋ ەردايىم ويداعىداي ٶتە بەرمەيدٸ. كەيدە ەنشٸلەر ەننٸڭ سٶزٸن ۇمىتىپ قالسا, ەندٸ بٸرٸ ساحنادا سٷرٸنٸپ, كٷتپەگەن جاعدايعا تاپ بولادى. قازاق ەستراداسىنىڭ تانىمال ٶكٸلدەرٸ دە مۇنداي سەتتەردٸ باستان ٶتكەرگەن. Ult.kz ەنشٸلەردٸڭ ٶزدەرٸ سۇحباتتارىندا ايتىپ بەرگەن ساحناداعى بەس قىزىقتى وقيعانى جيناقتادى.

1. نۇرجان كەرمەنباەۆ پرەزيدەنت الدىندا ەننٸڭ سٶزٸن ۇمىتىپ قالعان

"ارناۋ" توبى ارقىلى تانىلعان نۇرجان كەرمەنباەۆ بۇرىنعى پرەزيدەنت نۇرسۇلتان نازارباەۆتىڭ الدىندا ٶنەر كٶرسەتكەندە بولعان ىڭعايسىز جاعدايدى ەسكە العان. ەنشٸ بۇل وقيعانى توپتاعى ەرٸپتەسٸ سالتانات باقاەۆامەن بٸرگە Instagram جەلٸسٸندە بٶلٸسكەن.

ولاردىڭ ايتۋىنشا, بٸردە "الماتى كونتسەرت" ۇجىمىنىڭ ۇيىمداستىرۋىمەن بٸرنەشە ٶنەرپاز استاناعا شاقىرىلعان. سول كەشتە "ارناۋ" توبىنا پرەزيدەنت ۇناتاتىن "اقتاماق" جەنە "ەپيتٶك" ەندەرٸن ورىنداۋ تاپسىرىلعان. الايدا نۇرجان مەن سالتانات بۇل شىعارمالاردىڭ سٶزٸن بۇرىننان بٸلمەگەندٸكتەن, تٷنٸ بويى جاتتاۋعا مەجبٷر بولعان. تٸپتٸ استاناعا ۇشىپ بارا جاتقاندا دا ەن مەتٸندەرٸن قايتالاعان. كەش باستالعاندا ەكەۋٸ الدىمەن ٶز رەپەرتۋارىنداعى ەندەردٸ ورىنداعان. بٸراق كەزەك جاڭادان جاتتاعان شىعارمالارعا كەلگەندە, ەكەۋٸ دە سٶزٸن ۇمىتىپ قالعان.

"ەندٸ باسىنان اياعىنا دەيٸن "نا-نا-نا" دەپ ايتىپ شىقتىق. ەڭ قىزىعى, ەشكٸم كٷلمەدٸ", – دەپ ەسكە العان ٶنەر يەلەرٸ.

نۇرجان مەن سالتانات وسى وقيعادان كەيٸن "ارناۋ" توبى بولىپ پرەزيدەنتتٸڭ الدىندا قايتا ٶنەر كٶرسەتپەگەندەرٸن ەزٸلمەن جەتكٸزگەن.

2. مەدينا سەدۋاقاسوۆانىڭ بيشٸسٸ ساحنادا ىڭعايسىز جاعدايعا قالعان

تانىمال ەنشٸ مەدينا سەدۋاقاسوۆا كونتسەرت كەزٸندە كٶرەرمەندٸ كٷلكٸگە قارىق قىلعان وقيعانى 7 ارناعا بەرگەن سۇحباتىندا بايانداعان.

ەنشٸنٸڭ ايتۋىنشا, ول ساحنادا ەن ورىنداپ تۇرعان كەزدە زالداعى ادامدار اياق استىنان دۋ كٷلگەن. باستاپقىدا مەدينا كٶرەرمەندەردٸڭ نە سەبەپتٸ كٷلگەنٸن تٷسٸنبەگەن. كەيٸن ارتىنا بۇرىلىپ قاراعاندا عانا جاعدايدىڭ مەن-جايىن اڭعارعان. سٶيتسە, ەنشٸنٸڭ ارتىندا بيلەپ جٷرگەن جٸگٸتتٸڭ ساحنالىق كيٸمٸ جىرتىلىپ كەتكەن ەكەن. ەڭ قىزىعى, بيشٸ جٸگٸت ەشتەڭە بولماعانداي ٶنەر كٶرسەتۋٸن جالعاستىرا بەرگەن.

"ارتىما قاراپ قالسام, بيشٸ جٸگٸتتٸڭ شالبارى ورتادان قاق بٶلٸنٸپ جىرتىلىپ قاپتى. كومبينەزون. ول بايعۇس بيلەپ جاتىر", – دەپ ەسكە العان ەنشٸ.

مەدينا سول سەتتٸڭ تەلەديداردان قالاي كٶرسەتٸلگەنٸن دە بٸلمەيتٸنٸن ايتقان. كٷتپەگەن جاعداي ونىڭ ساحنالىق قويىلىمدارعا دەگەن كٶزقاراسىنا ەسەر ەتكەن. ەنشٸ وسى وقيعادان كەيٸن كونتسەرتتەردە كٷردەلٸ شوۋ ۇيىمداستىرۋعا ساقتىقپەن قاراي باستاعانىن جەتكٸزگەن. ول مۇنداي سەتتەردە ارتىق قىلامىن دەپ, تىرتىق قىلىپ الۋدان قورقاتىنىن جاسىرماعان.

3. اقبوتا-نۇر ەن ايتىپ تۇرىپ كٷلكٸسٸن توقتاتا الماعان

ەنشٸ ەرٸ اكتريسا اقبوتا-نۇر سەيٸتماعامبەت بٸر كونتسەرتتە قۋاندىق راحىممەن ەن ورىنداپ تۇرىپ, كٷتپەگەن جاعدايعا تاپ بولعان. ەكٸ ٶنەرپاز ساحنادا "التىنىم" ەنٸن شىرقاعان كەزدە اقبوتا كەنەت كٷلٸپ جٸبەرگەن. ونىڭ ەندٸ جالعاستىرا الماي, قايتا-قايتا كٷلگەن سەتٸ ەلەۋمەتتٸك جەلٸدە تاراعان. بەينەجازبانى كٶرگەن قولدانۋشىلار ەنشٸنٸڭ ەرەكەتٸن تٷرلٸشە باعالاپ, سىنعا العان.

كەيٸن اقبوتا Stan.kz باسىلىمىنا بەرگەن سۇحباتىندا وقيعانىڭ سەبەبٸن تٷسٸندٸرگەن. ونىڭ ايتۋىنشا, سول كەزدە ول بالاسىمەن بٸرگە گاسترولدٸك ساپاردا جٷرٸپ اۋىرىپ قالعان. قۋاندىق راحىم ەندەردٸ جاندى داۋىستا ورىندايتىندىقتان, اقبوتا دا ونىمەن بٸرگە جاندى داۋىستا ەن سالعان. الايدا ساحنادا تاماعى اۋىرىپ, جٶتەل قىسىپ, ەن ايتۋى قيىنداعان.

"ساحنادا ەن ايتىپ جاتقانىمدا جٶتەل قىستى. سوسىن قاقىرىق كەلە باستادى. ۇيات بولسا دا ايتايىن, قاقىرىقتى نە ەرٸ, نە بەرٸ ٶتكٸزە الماي قالدىم. سول ٷشٸن كٷلٸپ جٸبەردٸم", – دەگەن ەنشٸ.

ول وسى جاعدايعا بايلانىستى كٶپشٸلٸكتٸڭ ٶزٸن دۇرىس تٷسٸنبەگەنٸن ايتىپ, قۋاندىق راحىممەن ارالارىندا تەك دوستىق جەنە ەرٸپتەستٸك بايلانىس بار ەكەنٸن دە تٷسٸندٸرگەن.

4. روزا رىمباەۆا ساحنادا شالقاسىنان قۇلاپ تٷسكەن

قازاقستاننىڭ حالىق ەرتٸسٸ روزا رىمباەۆا دا ساحناداعى كٷتپەگەن وقيعالاردىڭ بٸرٸن "العاشقى" باعدارلاماسىندا ەسكە العان. ەنشٸنٸڭ ايتۋىنشا, كونتسەرتتەردٸڭ بٸرٸندە ول ەن ورىنداپ جٷرٸپ, ارتقا قاراي قوزعالعان. الايدا ساحنادا تۇرعان مۋزىكالىق قۇرىلعىنى بايقاماي قالعان. سونىڭ سالدارىنان ەنشٸ سٷرٸنٸپ, شالقاسىنان قۇلاپ تٷسكەن. روزا رىمباەۆا بۇل وقيعانى كەيٸن ەزٸلمەن ەسكە الىپ, ساحنادا سالتو جاساعانىن ايتقان.

"ساحنادا قۇلاعانمىن. ساحنادا نەشە تٷرلٸ تەحنيكا تۇرادى عوي. مەن ساحنادا كٶرەرمەننٸڭ الدىندا ەن ايتىپ, ارتقا قاراي كەلە جاتىپ, جەشٸكتٸ كٶرمەي قالعانمىن, سالتو جاسادىم عوي", – دەگەن ٶنەر يەسٸ.

وسى وقيعانى مۋزىكانت مۇرات بيسەنعاليەۆ تە ەسكە العان. ونىڭ ايتۋىنشا, كونتسەرت رەسپۋبليكالىق سارايدا ٶتٸپ, روزا رىمباەۆا ساحنا ورتاسىندا ەن ايتىپ, بيلەپ جٷرگەن. ەنشٸ قۇلاعان سەتتە مۋزىكانتتار ونىڭ جاراقات الىپ قالۋىنان قورقىپ, قاتتى شوشىعان. بٸراق روزا رىمباەۆا بٸردەن ورنىنان تۇرىپ, ەزٸل ايتىپ, كونتسەرتتٸ ەشتەڭە بولماعانداي جالعاستىرعان. ٶنەر يەسٸنٸڭ سول كەزدەگٸ سابىرلىلىعى مەن تاپقىرلىعى ەرٸپتەستەرٸنٸڭ ەسٸندە قالعان.

5. سەرٸك يبراگيموۆ جەكە كونتسەرتٸندە ٶز ەنٸنٸڭ سٶزٸن ۇمىتىپ قالعان

قازاق ەستراداسىنىڭ ەنشٸسٸ سەرٸك يبراگيموۆ تە جاندى داۋىستا ٶنەر كٶرسەتۋ كەزٸندە ىڭعايسىز جاعدايعا تاپ بولعان.

2019 جىلدىڭ قاڭتارىندا ونىڭ كونتسەرتتە ەن سٶزٸن ۇمىتىپ قالعان بەينەجازباسى ەلەۋمەتتٸك جەلٸدە تاراعان. وقيعا ەنشٸ "جوق دەمە" شىعارماسىن ورىنداۋعا شىققاندا بولعان. سەرٸك ەننٸڭ باسىنداعى سٶزدەردٸ ەسٸنە تٷسٸرە الماي, بٸراز ۋاقىت كٸدٸرٸپ قالعان. كەيٸن ول كٶرەرمەندەردەن ەندٸ قايتا باستاۋدى سۇراعان. وسى سەتتە ٶنەر يەسٸ جاندى داۋىستا ەن ايتىپ تۇرعانىن دا اتاپ ٶتكەن. الايدا ارتىنشا شىعارمانىڭ جاڭا ەكەنٸن جەنە مەتٸنٸن تولىق مەڭگەرٸپ ٷلگەرمەگەنٸن مويىنداعان.

"جاڭا ەن بولعاننان كەيٸن, سٶزٸ سەل ەسٸمە تٷسپەي تۇرعانى. باس جاعى..." – دەپ تٷسٸندٸرگەن ەنشٸ نتك ارناسىنىڭ "رەۆيۋ" باعدارلاماسىندا.

بۇل جاعداي جەلٸ قولدانۋشىلارى اراسىندا قىزۋ تالقىلانعان. بٸرٸ ەنشٸنٸ كونتسەرتكە جەتكٸلٸكتٸ دايىندالماعانى ٷشٸن سىناسا, ەندٸ بٸرٸ ونىڭ قاتەلٸگٸن جاسىرماي مويىنداعانىن قولداعان. سەرٸك يبراگيموۆتٸڭ ساحناداعى بۇل سەتٸ جاندى داۋىستا ٶنەر كٶرسەتۋ كەزٸندە كٷتپەگەن جاعدايلاردىڭ بولاتىنىن كٶرسەتكەن.

ساحناداعى مۇنداي وقيعالار تانىمال ٶنەرپازداردىڭ دا كٷتپەگەن جاعدايعا تاپ بولاتىنىن كٶرسەتەدٸ. بٸرٸ ەننٸڭ سٶزٸن ۇمىتىپ, ەندٸ بٸرٸ ساحناداعى قۇرىلعىعا سٷرٸنسە, كەيبٸرٸنە دەنساۋلىعى كەدەرگٸ بولعان. ەنشٸلەردٸڭ كەيٸن بۇل سەتتەردٸ اشىق ايتىپ, تٸپتٸ ەزٸلگە اينالدىرۋى ولاردىڭ ساحنا سىرتىنداعى بولمىسىن دا تانىتادى. ال كەزٸندە ىڭعايسىز كٶرٸنگەن جاعدايلار جىلدار ٶتە ٶنەر ادامدارىنىڭ ۇمىتىلماس ەستەلٸگٸنە اينالعان.