Qazaqstannyń avtokólik ónerkásibi qarqyndy damyp keledi. Sońǵy alty aida elimizde 94 400 avtokólik óndirilip, bul ótken kezeńmen salystyrǵanda 35%-ǵa artyq kórsetkishke jetti. Úkimettiń josparyna sáikes, jyl sońyna deiin óndiris kólemi 190 myń avtokólikke deiin ulǵaitylmaq, dep habarlaidy Ult.kz.
Naryq kóshbasshylary jáne óndiris qýatynyń artýy
Qazir Qazaqstanda jeńil avtokólik, avtobýs, júk jáne arnaiy tehnika shyǵaratyn 11 kásiporyn jumys isteidi. Otandyq óndiristegi eń kóp suranysqa ie modelder qatarynda Chevrolet Cobalt, Hyundai Tucson jáne Kia Sportage bar.
Salany damytýǵa jańadan iske qosylǵan joǵary tehnologiialyq kásiporyndar - Kia Qazaqstan men Astana Motors Manufacturing Kazakhstan aitarlyqtai úles qosyp otyr. Bul jobalarǵa salynǵan investitsiia kólemi 346 mlrd teńgeden asty. Jańa zaýyttar óndiris úderisteriniń keńinen avtomattandyrylýymen erekshelenedi. Qazirgi tańda onda 135 ónerkásiptik robot jumys isteidi.
Tereń óńdeýge basymdyq
Avtokólik óndirisindegi negizgi baǵyttardyń biri - iri torapty qurastyrýdan usaq torapty qurastyrýǵa (CKD)kóshý jáne jergilikti óndiris úlesin arttyrý.
Qazaqstandyq kásiporyndar qazirdiń ózinde nemese aldaǵy ýaqytta mynadai ónimderdi shyǵarýdy qolǵa almaq:
- qozǵaltqyshtar, akkýmýliatorlar jáne shinalar;
- avtobýstarǵa arnalǵan oryndyqtar, mýltimediialyq júieler men interer bólshekteri;
- bamperler, dońǵalaq diskileri, elektr symdary jáne lak-boiaý materialdary.
Qytailyq jańa brendter men innovatsiialyq jobalar
Prezident Qasym-Jomart Toqaevtyń Qytaiǵa memlekettik sapary barysynda qol jetkizilgen kelisimder avtokólik salasynyń jańa kezeńine jol ashty. Aldaǵy ýaqytta Qazaqstanda Li Auto (Lixiang), Omoda jáne Jaecoo brendteriniń óndirisi iske qosylady.
Sonyń ishinde Qazaqstan Li Auto gibridti krossoverlerin Qytaidan tys jerde shyǵaratyn alǵashqy memleket bolmaq.
Budan bólek, 2028 jylǵa qarai Sitrak markaly júrgizýshisiz magistraldyq tartqyshtardy óndirý jobasyn júzege asyrý josparlanǵan. Sonymen qatar elde elektr kólikterine arnalǵan joǵary qýatty zariadtaý stantsiialarynyń jelisi kezeń-kezeńimen keńeitiledi.
Ekonomika men jumyspen qamtýǵa serpin
Avtokólik ónerkásibiniń damýy el ekonomikasyna jáne eńbek naryǵyna oń áserin tigizip keledi. Búginde bul salada 10 myńnan astam adam eńbek etedi.
Úkimettiń negizgi maqsaty - óndiris kólemin arttyrýmen qatar, Qazaqstanda shyǵarylatyn avtokólikterdiń halyq úshin qoljetimdiligin qamtamasyz etý.
