Ishki mádeniet — ata-ana naqty “bylai iste”, “bulai isteýge bolmaidy” dep úiretkeninen bólek, anaǵurlym tereń nárse. Ishki mádeniet bul bala kezde ata-áje, ata-ana, mektep aitqan talai tárbielik áńgimeniń, qoǵam kórsetken biraq aitpaǵan myńdaǵan kórinistiń ishinen adamnyń boiynda qalyp qoiǵan ishki ólshem.
Máselen «Muny durys emes jasaýǵa bolady, biraq jasamaimyn», «Eshkim kórip turǵan joq, biraq bul áreketim durys bolmas». Iaǵni adamnyń ishinde bir kórinbeitin baqylaýshyqalyptasady. Qazirgi zamanda muny ishki filtr dep te ataimyz
Ádette qate jasaýǵa, kóptiń aldynda uiatqa qalýǵa qorqamyz. Ata-anamyz bilip qoisa, aýyldaǵylar aityp barsa, kórshimiz kórip qoisa, áleýmettik jelige shyǵyp ketse Qudai saqtasyn deimiz. Jurttyń sózi, kózi bizdi kei qatelikterden saqtap turady. Biraq “Eger bizdiń áreketimizdi eshkim kórmese, ata-anamyzdyń kim ekenin bilmese, aýyl, elden jyraq júrgende báribir sol áreketti jasar ma edik?» Osy suraqtyń jaýaby árkimniń ishki mádenieti.
Qazir jańa qoǵamdyq keńistik paida boldy. Ol áleýmettik jeli. Munda adamnyń bet-júzi kórinbeidi. Daýysyn da estimeimiz. Kei qoldanýshylar óz atyn jasyryp otyratyny taǵy bar. Sodan bolar áiteýir pikir bildirýdiń alańy dep, basqa taraptyń kóńiline keler oilardy ońai jazady. Biraq kóz kórip turmasa da jazylǵan pikirden-aq sol adamnyń ishki mádenieti anyq kórinip turady.
Abzalynda
Biz mádeniettilikti kóbine úlken nárselerden izdeimiz. Qazirgi trend mysaly kitapqumar bolý, teatrǵa barý, ónertaný, ádemi sóileý jáne t.b. Alaida adamnyń ishki mádenieti týra eki el arasyndaǵy saiasi ádep sekildi qatynasta esh taraptyń kóńiline kelmei, názik shekaralardy buzyp almai sóilep, áreket etýden turady. Mundai qatynastan adamnyń oi-órisi, dúnietanymy, nieti aiqyn kórinedi. Sol sebepti bir qoǵamda kóppen birge úilesimdi ómir súrý úshin óz erkindigimiz ben ózgeniń shekarasynyń arasyndaǵy názik tepe-teńdikti saqtai bilý ónerin árqaisymyzǵa meńgergen jón. Ári bul qasiet ár adamnyń ainasy ekendigin este ustaiyq.
