Qazaqstan ónerkásiptiń dástúrli salalarynda, eń aldymen taý-ken metallýrgiia kesheninde jańa óńdeý kezeńderin qurý arqyly turaqty ári sapaly ekonomikalyq ósimge qol jetkize alady. Bul týraly ekonomikalyq sholýshy Iýrii Masanov Facebook jelisindegi paraqshasynda málimdep, otandyq metallýrgiia sektorynyń áleýetin egjei-tegjeili taldap berdi, dep habarlaidy Ult.kz.
Sarapshynyń aitýynsha, qazirgi ýaqytta el resýrstardy jer qoinaýynan shyǵarǵan boida eksportqa jóneltýdi jalǵastyryp otyr. Ulttyq statistika biýrosynyń derekteri de osy úrdisti rastaidy: 2024 jyly shetelge 3,14 mlrd AQSh dollaryna 1,8 mln tonna mys keni men kontsentraty jóneltilse, 2025 jyly eksport kólemi 2,8 mlrd dollarǵa 1,4 mln tonnany qurady. Al 2026 jyldyń alǵashqy jeti aiynda 2,3 mlrd dollarǵa 845 myń tonna shikizat syrtqa shyǵarylǵan.
Turaqty valiýtalyq túsimge qaramastan, óńdelmegen resýrstardy satý negizgi qosylǵan qundy memleketten tys jerde qaldyrady. Sarapshy mys kontsentraty óndiristik tizbektegi bastapqy núkte ǵana ekenin, odan keiin balqytý, qara jáne anodty mys, rafinadtalǵan katodty mys alý, sondai-aq sym, kabelder men kúrdeli jabdyqtar shyǵarý júrýi tiis ekenin atap ótti.
«Osy jańa qaita óńdeý deńgeileriniń árqaisysynda qosylǵan qun ósedi. Bul degenimiz — jańa óndirister men jumys oryndarynyń paida bolýy, bilikti mamandarǵa, energetikaǵa, transport pen servisge degen suranys. Shikizat eksportynyń ornyna biz el ishinde tolyqqandy ónerkásiptik ekojúie qalyptastyra alamyz», — dep atap ótti Iýrii Masanov.
Shikizatty tereń óńdeý, sonymen qatar, altyn men kúmis siiaqty ilespe baǵaly metaldardy bólip alýǵa jáne álemdik logistikalyq baǵdarlardyń turaqsyzdyǵy jaǵdaiynda ýran salasyna óte qajet kúkirt qyshqylyn óndirýge múmkindik beredi.
Halyqaralyq energetikalyq agenttiktiń jasyl tehnologiialar, jasandy intellekt jáne data-ortalyqtardyń damýyna bailanysty 2035 jylǵa qarai mys defitsiti bolýy múmkin degen boljamdary aiasynda Qazaqstanǵa jańa investitsiialyq tsikldy bastaý mańyzdy.
Ekonomisttiń pikirinshe, bul protsestiń bastapqy qadamy el ishinde jańa mys balqytý zaýyttaryn salý bolýy tiis.
