Áielder sońǵy jyldary aitarlyqtai ózgerdi. Kóp jaǵdaida bul ózgeris óz qalaýynan góri, jańa zaman talaptaryna beiimdelý qajettiliginen týyndady. Sebebi áiel ózgermese, erler basym jerde olarmen birdei qyzmette, qoǵamda moiyndalý áldeqaida qiyn edi.
Búginde saýatty, bilimdi, ózin-ózi asyrap júrgen áielder kóp. Óz kásibi, mansaby bar. Ata-anasyna, balalaryna, tipti týǵan-týystaryna kómektesedi. Dene bitimine, densaýlyǵyna, syrtqy kelbetine kóńil bóledi. Saiahattaidy, til úirenedi, óz psihologiiasymen jumys isteidi. Ana bolýdy da, kásibi damýdy da qatar alyp júrýge tyrysady.Al er adamdarda osy qarqyn baiqala ma?
Árine, bilimdi, jaýapkershiligi joǵary, ózin damytatyn er adamdar bar. Biraq keibir áleýmettik tendentsiialarǵa qarasaq, olardyń ózgerý qarqyny áielderdegi ózgeris jyldamdyǵymen salystyrǵanda baiaýyraq kórinedi. Sonyń ishinde er adamdardyń áleýmettik, emotsionaldyq damýyna qatysty máseleler de jii aitylady. Munyń sebebi nede?
Jaratylystyń áseri bar. Iá, er men áieldiń biologiialyq erekshelikteri, reprodýktivtik róli, táýekelge barý deńgeii ártúrli. Biraq adamnyń búkil minez-qulqyn tek biologiiamen túsindirý de durys bolmas. Sebebi tánge aqyl, mádeniet, tárbie, qoǵamnyń áseri qosylady.
Uzaq ýaqyt boiy kóptegen qoǵamda er adamnan negizinen aqsha tabý, otbasyn asyraý, syrtqy álemmen kúresý talap etildi. Al áiel burynnan otbasyny ustaý, bala tárbieleý, emotsiialyq jylýlyqpen bólisý siiaqty mindetterdi atqaryp keldi. Búginde osy fýnktsiialaryna qosa ol ári ana, ári maman, ári kásipker, ári qoǵamnyń belsendi múshesi bolýǵa tyrysady.
Mine, osy jerde belgili bir alshaqtyq paida bolǵandai. Óitkeni keibir jaǵdailarda er adamdar burynǵy mindetterimen shektelip, qazirgi qoǵam talap etip otyrǵan jańa áleýmettik jáne emotsiialyq rólderdi moiyndap, qabyldaýǵa áli de beiimdelip jatyr.
Abzalynda
Ósip kele jatqan uldarǵa jańa zaman talaptaryna beiimdelý joldaryn kórsetýimiz kerek. Sebebi áielde burynǵydai «maǵan qamqor bolatyn er kerek» degen qajettilik azaidy. Endi tek tabys taýyp, túzdegi áke bolý jetkiliksiz.
Qazirgi tańda erlerden emotsionaldyq intellekt, jaýapkershilik qasietteriniń bolýy asa talap etiledi. Áielin tyńdai alatyn, qajet kezinde qoldaityn, balamen emotsionaldyq berik qatynas ornata alýy óte mańyzdy. Óz ómirlerin erlerden kem emes jasap júrgen qyz-kelinshekke qazir jai asyraýshy azdyq etetindei. Áielderge qazir ózimen deńgeiles myqty seriktes kerek. Uldarymyzdy osyǵan daiyndaýymyz kerek.
