Shymkentte 21 jastaǵy Nurai Serikbaidyń ólimine qatysty qylmystyq is boiynsha sot úkimi shyqty. 13 tamyzda Shymkent qalasynyń mamandandyrylǵan aýdanaralyq qylmystyq soty Sherhan Aimahandy ómir boiyna bas bostandyǵynan aiyrdy, dep habarlaidy ult.kz.
Sot ony QR Qylmystyq kodeksiniń úsh baby boiynsha kináli dep tanydy. Atap aitqanda, «Stalking» baby boiynsha 200 saǵat qoǵamdyq jumys, «Nekege turýǵa májbúrleý» boiynsha eki jyl bas bostandyǵynan aiyrý jáne asa qatygezdikpen adam óltirgeni úshin ómir boiyna bas bostandyǵynan aiyrý jazasy taǵaiyndaldy. Negizgi jaza tótenshe qaýipsizdik mekemesinde óteledi.
Sot materialdaryna sáikes, qaiǵyly oqiǵa 2026 jylǵy 11 qańtarda bolǵan. Nuraidyń denesinen pyshaq jaraqattary tabylǵan. Tergeý barysynda Sherhan Aimahannyń qyzdy uzaq ýaqyt boiy ańdyp, ony nekege turýǵa májbúrleýge áreket jasaǵany anyqtalǵan.
Úkim shyqqannan keiin Nuraidyń aǵasy Sultan Serikbai áleýmettik jelidegi paraqshasynda qaryndasyna arnalǵan jazbasyn jariialady.
«Nuraika, men ádildik ornaýy úshin qoldan kelgenniń bárin jasap jatyrmyn.
Meni keshir…
Men seni qorǵai almadym…», - dep jazdy ol.
Sultan Serikbai buǵan deiin otbasy úshin eń basty talap materialdyq ótemaqy emes, aiyptalýshyǵa eń qatań jaza taǵaiyndaý bolǵanyn aitqan. Onyń sózinshe, otbasy sońǵy segiz ai boiy dálelder jinap, istiń sotta qaralýyna deiin osy maqsat úshin kúresken.
