Quryltai depýtaty Aidos Sarym depýtattardyń Premer-ministrge suraq qoia almaityny týraly pikirdiń shyndyqqa janaspaitynyn aitty. Sonymen qatar ol jýrnalisterdiń depýtattarǵa suraq qoiý múmkindigi shektelmegenin aityp, bul úshin túrli múmkindik bar ekenin atap ótti, dep habarlaidy ult.kz.
Depýtat bul pikirdi jýrnalistiń Qazaqstanda sóz bostandyǵy shektelip jatqany týraly suraqtarǵa jaýap berý kezinde aitty.
Aidos Sarymnyń aitýynsha, aldaǵy ýaqytta mediaǵa qatysty zań jobasy boiynsha jumys bastalady. Onyń aiasynda onlain platformalarǵa qatysty máselelermen qatar, basqa da mańyzdy taqyryptar talqylanbaq.
«Oǵan belsendi aralasý kerek. Kýlýarda ǵana emes, dalada da ustap jatyr áriptesterińiz. Telefonymdy bilesizder. Biz 100 paiyz ashyq adamdarmyz. Qanshama adam telefonmen habarlasyp, suhbat alyp jatyr. Parlamenttiń aldynda, dalada da suhbat berip jatyrmyz. Múmkindikterdiń bári bar», – dedi depýtat.
Ol depýtattardyń Premer-ministrge suraq qoia almaityny týraly pikirdiń reglamentti durys túsinbeýden týyndaǵanyn atap ótti.
«Olar bizdiń reglamentti durys oqymaǵan, durys túsinbegen. Birinshiden, bizde jylyna bir ret bolatyn formattar bar. Mysaly, Konstitýtsiialyq sottyń tóraǵasy jylyna bir ret kelip, bizge esep beredi. Format boiynsha depýtattar oǵan suraq qoimaidy, tek aqparatyn qabyldaidy. Bul da jylyna bir ret bolatyn premer-ministrdiń formaty», – dedi Sarym.
Depýtattyń túsindirýinshe, bul Premer-ministrge suraq qoiýǵa múmkindik joq degendi bildirmeidi. Úkimet basshysy Parlamentke biýdjet máselesin qorǵaý, esep berý nemese basqa da jumystar aiasynda kele alady. Sondai-aq depýtattar Premer-ministrge depýtattyq saýal joldai alady.
Sarym ótken shaqyrylymdaPpremer-ministrdiń «Amanat» partiiasynyń fraktsiiasyna jylyna birneshe ret kelgenin mysalǵa keltirdi.
«Sol kezde ashy, kez kelgen suraqtar qoiylyp jatatyn», – dedi ol.
Aidos Sarym qazirgi zańnama men jańa Konstitýtsiiaǵa sáikes depýtattardyń Premer-ministrge suraq qoiý múmkindigi saqtalatynyn atap ótti.
«Depýtattar Premer-ministrge suraq qoia alady, suraqtaryn qoiýdy jalǵastyra beredi. Depýtattyq saýaldar arqyly, biýdjetke qatysty máselelerde, esep berip jatqan kezde. Bizde parlamenttik tyńdaý degen format bar. Úkimet saǵattary bolyp jatyr. Sonyń kez kelgeninde depýtattar suraq qoia alady», – dedi depýtat.
Sonymen qatar ol jýrnalisterge depýtattarmen bailanysýǵa múmkindik bar ekenin aityp, partiialardyń baspasóz qyzmetteri arqyly da suraq qoiýǵa bolatynyn jetkizdi.
