Qairat Nurtastyń anasy, prodiýser Gúlzira Aidarbekova Nursultan Jaqsygenge qatysty shyqqan sot úkimine bailanysty oiyn aitty. Ol sottalǵan azamatqa taǵaiyndalǵan jaza merzimin jeńildetý máselesin kóterip, onyń otbasy men balalaryna alańdaitynyn jetkizdi, dep habarlaidy ult.kz.
Eske salaiyq, Almaty oblysynyń Qarasai aýdandyq soty Nursultan Jaqsygendi kináli dep tanyp, 2 jyl 3 aiǵa bas bostandyǵynan aiyrý týraly úkim shyǵarǵan. Sonymen qatar oǵan bes jyl boiy buqaralyq aqparat quraldary men áleýmettik jelilerde sóz sóileýge tyiym salynǵan. Budan bólek, Fariza Sabyrálievanyń paidasyna 5 million teńge óndirý týraly sheshim qabyldanǵan.
Gúlzira Aidarbekova Jaqsygenniń jaýapkershilikten bosatylýyn emes, oǵan taǵaiyndalǵan jazanyń jeńildetilgenin qalaitynyn aitty.
«Múmkindik bolsa, sonshalyqty qatygezdik tanytpaýǵa da bolar ma edi. Ortada bala-shaǵalary bar shyǵar. Kisi óltirip, qyz zorlap, urlyq jasaǵan joq. Jeńildetkeni durys-aý. Kimniń basynan ne ótpeidi, eshqaisyńyzdyń bala-shaǵańyzdyń basyna bermesin», – dep jazdy prodiýser.
Onyń pikirinshe, sottalǵan azamatqa eki jyldan astam jaza berýdiń ornyna bir jyl bas bostandyǵynan aiyrý jetkilikti bolýy múmkin. Aidarbekova túrmede uzaq otyrý adamnyń minez-qulqyna keri áser etýi yqtimal ekenin de atap ótti.
«Jazasyn alý kerek, biraq kishkene jeńildetip, 2 jarym jyl emes, 1 jyl da jetkilikti me degenim ǵoi. Ol jaqtan túzelip emes, qany bezer bolyp, buzylyp kelýi de múmkin ǵoi», – dedi ol.
Sonymen birge prodiýser Nursultan Jaqsygendi jaqynnan tanymaitynyn, sondyqtan onyń qandai adam ekenin bilmeitinin atap ótti.
«Áiteýir ata-anasy bar, bala-shaǵasy bar, eshkim jylamasa degenim ǵoi», – dep túiindedi Gúlzira Aidarbekova.
Aita keteiik, prodiýser bul pikirin áleýmettik jelidegi Nursultan Jaqsygenge qatysty jazbalardyń biriniń astyna qaldyrǵan.
