Kaspii teńizindegi áskeri oqý-jattyǵý kezinde aman qalǵan sarbaz Temirhan Aqjol Timýrulynyń aýrýhanada jatqan sáti kópshiliktiń júregin aýyrtty, dep habarlaidy ult.kz.
Áleýmettik jelide taraǵan fotoda onyń qolynan qaza bolǵan qarýlasynyń bereti kórinedi.
Sýretti áleýmettik jelide Aian Óribai jariialaǵan. Onyń aitýynsha, Aqjol aýyr jaǵdaida jatsa da, qaza bolǵan dosy Mádihan Azamat Bolatbekulynyń beretin qolynan shyǵarmaǵan.
Sarbaz beretti marqumnyń ata-anasyna ózi tabystaǵysy keletinin aitqan.
«Azamat dosymdyki, ózim berem dep qolynan jibermeidi. Beibit zamanda Otan aldyndaǵy boryshyn ótep júrgen qarshadai jigitter baqilyq bolyp ketti. Ajal aiaq asty, bir sátte…», – dep jazdy Aian Óribai.
Qorǵanys ministrligi taratqan resmi málimette Mádihan Azamat Bolatbekuly Kaspii teńizindegi oqý-jattyǵý kezinde qaza tapqan merzimdi áskeri qyzmettegi matrostardyń qatarynda kórsetilgen.
Oqiǵa kezinde sarbazdardyń bir bóligi teńizge aǵyp ketken. Qaza tapqandar men iz-túzsiz ketken áskeri qyzmetshilerge qatysty izdestirý-qutqarý jumystary júrgizildi.
Aman qalǵan sarbazdyń ákesiniń videosy tarady.
Aita keteiik, Aqtaýda qaza tapqan áskeri qyzmetshilerdiń týystary men jaqyndary qalalyq máiithananyń aldyna jinaldy. Olar qaza bolǵan sarbazdardy taný rásimin ótkizýdi talap etti.
Qazir jergilikti bilik áskeri qyzmetshilerdiń máiitterin týǵan jerlerine jetkizý jumystaryn uiymdastyryp jatyr. Olardy Aqtaý máiithanasynda týystaryna berý josparlanbaǵan.
Mańǵystaý oblysy ákiminiń orynbasary Ǵalymjan Niiazov máiitter qysqa merzim ishinde qaza tapqan áskeri qyzmetshilerdiń turǵylyqty jerlerine jetkiziletinin aitty. Sol jerde máiitter týystaryna tabystalady.
