Ońtústikkoreialyq ENHYPEN tobynyń kóshbasshysy Chonvon áleýmettik jelide taraǵan synnan keiin qazaqstandyqtardan keshirim surady, dep habarlaidy Ult.kz, qazaqshanews-ke silteme jasap.
Buǵan deiin Chonvon qazaqstandyq horeograf bastaǵan bi trendin qaitalap túsirgen videosyn jariialaǵan. Alaida jeli qoldanýshylary onyń kigen fýtbolkasyndaǵy «Borat» filmine qatysty beinege nazar aýdarǵan.
Pikir bildirýshilerdiń aitýynsha, bul film Qazaqstan týraly jalǵan ári qorlaityn stereotipterdiń taralýyna sebep bolǵan. Sondyqtan mundai beinesi bar kiimdi paidalaný, ásirese qazaqstandyq avtordyń trendine qatysý kezinde, kópshilik tarapynan qurmetsizdik retinde qabyldanǵan.
Osydan keiin Chonvon tikelei efirge shyǵyp, jaǵdaiǵa qatysty túsinikteme berdi. Onyń aitýynsha, ol fýtbolkadaǵy beineniń «Borat» filmimen bailanysty ekenin bilmegen.
«Keiin bul beineniń Qazaqstandaǵy kóptegen adamdar qorlaityn dep sanaityn filmmen bailanysty ekenin bildim. Shynymdy aitsam, men muny bilmedim. Biraq eger meniń kigen fýtbolkam adamdarǵa jaisyzdyq týdyrsa, onda bul - meniń qateligim. Barshańyzdan shyn júrekten keshirim suraimyn», - dedi ónerpaz.
Chonvon sóziniń sońynda daýly fýtbolkany birden laqtyryp jibergenin jáne videony óshirip tastaǵanyn aitty. Sondai-aq ol keshirim suraýdy erterek josparlaǵanyn, biraq Qazaqstanda tún bolǵandyqtan úndeýin kópshilik kórýi úshin tań atqansha kútkenin jetkizdi.
