Qazaq kinosynyń belgili akteri Doshan Joljaqsynov áigili “Qyz Jibek” filmine qatysty mańyzdy máseleni kóterdi. Ol jýrnalist Janar Baisemizge bergen suhbatynda filmdegi tarihi kamzoldyń taǵdyryna alańdaitynyn aitty, dep habarlaidy ult.kz.
Óner iesi “Qyz Jibek” beinesi men ony somdaǵan aktrisa Merýert Ótekeshovanyń esimi halyq jadynda birge saqtalǵanyn atap ótti. Onyń pikirinshe, kino arqyly qalyptasqan mádeni mura tek óner týyndysy emes, ulttyń tarihi jady retinde baǵalanýy tiis.
Akter ásirese filmde qoldanylǵan kamzol siiaqty jádigerlerdiń saqtalýy mańyzdy ekenin aityp, olardyń arnaiy mýzeilerde qorǵalýy qajet ekenin jetkizdi.
«Qyz Jibekti oinaǵan – Merýert. Qyz Jibek degen beine – halyqtyń jadynda birge. Osyndai dúnieler joǵalmaýy kerek. Olar Sháken Aimanov mýzeiinde nemese Ortalyq mýzeide saqtalýy tiis edi», — dedi ol.
Joljaqsynovtyń aitýynsha, mundai tarihi kiimder ulttyń mádeni murasyn kórsetetin qundy jádiger retinde saqtalýy kerek. Ol osy máselege alańdap, qoǵamnyń rýhani qundylyqtarǵa degen kózqarasyna syn aitty.
«Biz qai baǵytta bara jatyrmyz? Bireýdi este saqtaý úshin, ol adam ómirden ótýi kerek pe?» — dep qynjylysyn bildirdi akter.
Onyń pikirinshe, óner men mádenietke qatysty osyndai dúnieler joǵalmai, keler urpaqqa jetkizilýi tiis.
