Atyraý oblysynda tórt adamnyń ólimine qatysty qoǵamda úlken rezonans týdyrǵan qylmystyq is sottaǵy sheshýshi kezeńge jetti. Memlekettik aiyptaýshy aiyptalýshy Sultan Sársemálievke ómir boiyna bas bostandyǵynan aiyrý jazasyn taǵaiyndaýdy surady, dep habarlaidy ult.kz.
Tergeý nusqasyna sáikes, Sársemáliev burynǵy jubaiynyń ata-anasyn, aǵasy men ápkesin óltirdi dep aiyptalyp otyr. Sondai-aq oǵan qylmystan keiin marqumdardyń múlkin iemdenýge, bank shottary men uialy telefondaryn paidalanýǵa jáne qylmystyń izin jasyrýǵa áreket jasady degen aiyptar taǵylǵan.
Sot talqylaýy barysynda aiyptaý kólemi keńeitilip, kisi óltirýden bólek, iri kólemdegi urlyq, alaiaqtyq, mal urlyǵy jáne qujattardy zańsyz iemdený baptary da engizildi.
Aiyptalýshy keibir epizodtar boiynsha kinásin ishinara moiyndaǵanymen, tórtinshi adamnyń ólimi ózin-ózi qorǵaý kezinde bolǵanyn aityp, bul aiyppen kelispeitinin málimdedi.
Prokýrordyń pikirinshe, bul is boiynsha eń qatań jazany suraýǵa birneshe aýyrlatatyn mán-jai negiz bolǵan. Atap aitqanda, tórt adamnyń qaza tabýy, qylmystyń erekshe qatygezdikpen jáne paidakúnemdik nietpen jasaldy degen aiyp, sondai-aq birneshe aýyr qylmystyń bir is aiasynda qaralýy eskerilgen.
Jábirlenýshi tarap sottan materialdyq jáne moraldyq shyǵyn retinde 70 million teńge óndirýdi surady. Sonymen qatar memlekettik aiyptaýshy Jábirlenýshilerge ótemaqy qoryna tólem óndirip alýdy jáne sot shyǵyndaryn óteýdi talap etti.
Qazirgi ýaqytta sot jaryssózi aiaqtalýǵa jaqyn. Kelesi kezeńde aiyptalýshy sońǵy sózin aityp, odan keiin sot úkim shyǵarý úshin keńesý bólmesine ketedi.
Aita ketý kerek, prokýrordyń ómir boiyna bas bostandyǵynan aiyrý týraly ótinishi túpkilikti sot sheshimi bolyp sanalmaidy. Qazaqstan zańnamasyna sáikes adamnyń kinási tek zańdy kúshine engen sot úkimimen ǵana anyqtalady.
Eske salsaq, bul is Atyraý oblysynyń Jangeldin aýylynda Qarabalinder otbasynyń tórt múshesiniń ólimine bailanysty qozǵalǵan. Tergeý barysynda negizgi kúdikti Sultan Sársemálievke taǵylǵan aiyptardyń kólemi birneshe ret tolyqtyrylǵan.
