Astanadaǵy «Beijiń Palas» qonaqúiinde Qytaidyń Qazaqstandaǵy Bas saýda palatasynyń uiymdastyrýymen Ortalyq Aziia kásiporyndarynyń ESG (ekologiialyq, áleýmettik jáne korporativtik basqarý) salasyndaǵy ozyq tájiribelerine arnalǵan seminar ótti, dep habarlaidy ult.kz.
Is-shara aiasynda Qytaidyń ekonomikalyq aqparat qyzmeti men «Bir beldeý – bir jol» halyqaralyq jasyl damý koalitsiiasy birlesip ázirlegen Ortalyq Aziia kompaniialarynyń ozyq ESG tájiribeleri jinaǵy alǵash ret tanystyryldy.
Seminarǵa Qazaqstan men Qytaidyń memlekettik organdarynyń, halyqaralyq uiymdardyń, biznes qaýymdastyqtardyń, saýda-ónerkásip palatalarynyń jáne saraptamalyq ortalyqtardyń ókilderi qatysty. Qatysýshylar «jasyl» biznesti damytý, turaqty damý qaǵidattaryn engizý, sondai-aq óńirdegi ESG standarttaryn jetildirý máselelerin talqylady. Sonymen qatar Qytai men Ortalyq Aziia elderi arasyndaǵy turaqty damý baǵytyndaǵy yntymaqtastyqtyń jańa ekojúiesin qalyptastyrý joldary sóz boldy.
ESG salasyndaǵy úzdik korporativtik tájiribeler baiqaýy biyl kóktemde jariialanyp, oǵan Ortalyq Aziia elderinen energetika, qarjy jáne basqa da salalardy qamtityn 59 joba usynylǵan. Sarapshylar olardyń ishinen eń úzdik 13 jobany iriktep, arnaiy jinaqqa engizdi.
Seminarda ESG qaǵidattarynyń halyqaralyq investitsiialar úshin mańyzy da erekshe atalyp ótti. Qazirgi tańda halyqaralyq investorlar kompaniialardyń qarjylyq nátijelerimen qatar olardyń ekologiialyq jaýapkershiligine, qyzmetkerlerge degen kózqarasyna jáne korporativtik basqarý sapasyna da basymdyq beredi. Bul óz kezeginde biznestiń sheteldik naryqtarǵa shyǵýy men investitsiia tartýyna tikelei áser etedi.
«Atameken» QR Ulttyq kásipkerler palatasy janyndaǵy Turaqty damý jáne ESG jónindegi keńestiń tóraiymy Iýliia Iakýpbaeva Qazaqstanda dekarbonizatsiia strategiiasyn iske asyrýǵa arnalǵan jol kartasy ázirlenip jatqanyn aitty.
Onyń sózinshe, qujat aýyl sharýashylyǵy, sý resýrstaryn únemdeý, turǵyn úi-kommýnaldyq sharýashylyq jáne energiia tiimdiligi sekildi ekonomikanyń barlyq derlik sektoryn qamtidy. Bul elimizdegi jasyl kún tártibin ilgeriletýge jáne turaqty damý qaǵidattaryn keńinen engizýge múmkindik beredi.
"Qazirgi ýaqytta elimizdiń dekarbonizatsiia strategiiasyna arnalǵan jol kartasy qabyldanýǵa daiyndalyp jatyr. Ondaǵy ózgerister aýyl sharýashylyǵynan, sý únemdeýden bastap turǵyn úi-kommýnaldyq sharýashylyq pen energiia tiimdiligine deiin ekonomikanyń barlyq derlik sektoryn qamtidy. Munyń bári – álemniń kóptegen elderinde qarqyndy damyp kele jatqan jasyl kún tártibiniń quramdas bóligi", – dedi Iýliia Iakýpbaeva.
Is-sharaǵa qatysýshylar mundai halyqaralyq alańdar úzdik tájiribelermen almasýǵa ǵana emes, Ortalyq Aziiadaǵy turaqty biznesti damytýdyń ortaq tásilderin qalyptastyrýǵa jáne óńirlik áriptestikti nyǵaitýǵa yqpal etetinin atap ótti.
