Astanada aǵza transplantatsiiasy máselesine arnalǵan «4739» derekti filminiń tusaýkeseri ótti. «Habar» agenttigi túsirgen týyndy transplantolog dárigerlerdiń eńbegi, donorlyqtyń mańyzy jáne ómirlik mańyzdy ota kútip júrgen naýqastardyń taǵdyry týraly baiandaidy, dep habarlaidy ult.kz.
Is-sharaǵa QR Premer-ministriniń orynbasary – mádeniet jáne aqparat ministri Aida Balaeva, densaýlyq saqtaý ministri Aqmaral Álnazarova, dárigerler, ǵalymdar, qoǵam qairatkerleri, retsipientter men olardyń jaqyndary, sondai-aq filmniń avtorlary men keiipkerleri qatysty.
Aida Balaeva Memleket basshysy Qasym-Jomart Toqaev ult densaýlyǵy eldiń basty qundylyqtarynyń biri ekenin únemi atap ótetinin aitty. Onyń sózinshe, memleket azamattardyń ómirin saqtap qalýǵa baǵyttalǵan barlyq meditsinalyq múmkindikti, sonyń ishinde transplantatsiia júiesin de damytýǵa erekshe kóńil bólip keledi.
Filmniń ataýy kezdeisoq tańdalmaǵan. Qazirgi tańda Qazaqstanda 4739 adam aǵza transplantatsiiasyn kútý tiziminde tur. Olardyń kópshiligi úshin bul – ómirin saqtap qalýdyń jalǵyz joly. Alaida jyl saiyn 350-den astam patsient qajetti donor tabylmai, operatsiiaǵa jete almai qaitys bolady.
Resmi málimetke sáikes, sońǵy bes jylda elimizde 1 500-ge jýyq aǵza transplantatsiiasy jasalǵan. Onyń árbir tórtinshisi 2025 jyly oryndalǵan. Ótken jyly ǵana búirek, baýyr, júrek jáne ókpe transplantatsiiasy boiynsha 310 operatsiia ótkizildi.
Balalar transplantologiiasy da qarqyndy damyp keledi. Biyl Qazaqstanda alǵash ret balaǵa júrek transplantatsiiasy sátti jasalyp, otandyq joǵary tehnologiialyq meditsinanyń jańa kezeńi bastaldy.
Sonymen birge, elimizde aǵza transplantatsiialarynyń shamamen 90 paiyzy tiri týystyq donorlardyń qatysýymen júzege asady. Al qaitys bolǵannan keiingi donorlyqtyń úlesi 10 paiyzǵa da jetpeidi.
Búginde elektrondyq úkimet portaly arqyly qaitys bolǵannan keiingi donorlyqqa qatysty óz ustanymyn 172 283 adam bildirgen. Onyń ishinde 16 109 azamat kelisim berse, 156 174 adam bas tartqan.
24KZ telearnasynyń jýrnalisi Nazerke Toqjan men rejisser Berik Sharov túsirgen «4739» derekti filmi patsientter men dárigerlerdiń shynaiy oqiǵalary arqyly adam ómiriniń qundylyǵy, donorlyq mádenieti jáne der kezinde qabyldanǵan sheshimniń mańyzyn kórsetedi. Týyndy kórermenge 24 shilde kúni saǵat 19:30-da 24KZ telearnasynan usynylady.
