Prezident Qasym-Jomart Toqaev Respýblika kúnimen quttyqtaýynda Qazaqstannyń egemendik jyldaryndaǵy jetistikterin atap ótip, eldiń aldaǵy damý baǵyttaryna toqtaldy. Memleket basshysy ozyq tehnologiialardy damytý, infraqurylymdy jańǵyrtý jáne Ádiletti, Qaýipsiz, Ozyq ári Taza Qazaqstan qurý maqsatyna basymdyq berdi, dep habarlaidy ult.kz.
"Qymbatty otandastar!
Barshańyzdy ulttyq merekemiz – Respýblika kúnimen quttyqtaimyn!
Bul – myńjyldyqtardan tamyr tartatyn qazaq memlekettiliginiń qaita jańǵyrýyn aishyqtaityn qasterli mereke.
Biz egemendik jyldarynda talai syn-qaterdi eńserip, biik belesterdi baǵyndyrdyq. Osylaisha, elimizdiń irgesin bekemdep, eldigimizdiń tuǵyryn nyǵaita tústik.
Qazaqstan Táýelsizdiktiń 35 jyldyq mejesine ekonomikasy qýatty, qoǵamy jasampaz, kúlli álem qaýymdastyǵy qurmetpen qaraityn, bedeli zor ári yqpaldy orta derjava, órkenietti memleket retinde jetip otyr.
Biyl biz ult jylnamasynyń jańa paraǵyn ashyp, tarihi órleý dáýirine betburys jasadyq.
Aldymyzda turǵan maqsat – barshaǵa aiqyn. Biz myqty memlekettik institýttary men sapaly adam kapitaly bar, jahandyq básekege qabiletti, ozyq, damyǵan, jasampaz, zaiyrly el bolýymyz kerek.
Osy oraida, Konstitýtsiiamyzdyń zańdy kúshine enýi halyqaralyq qoǵamdastyqtyń nazaryn aýdarǵan, tarihi mán-maǵynasy asa erekshe oqiǵa boldy.
Konstitýtsiia memlekettik basqarý júiesiniń tolyǵymen jańarýyna, elimizdiń saiasi, ekonomikalyq, mádeni jáne áleýmettik salalarynda túbegeili ózgerister jasaýǵa úlken serpin berdi.
Biz Konstitýtsiiada aiqyndalǵan qundylyqtarǵa súiene otyryp, strategiialyq baǵdarymyzdan ainymai, mindetti túrde alǵa qadam basamyz, aldymyzǵa qoiǵan barlyq mindetterdi júzege asyramyz.
Qazir biz ozyq tehnologiialar men innovatsiialardy júieli damytyp, jasandy intellektiniń múmkindikterin el igiligine jarata bastadyq.
Zamanaýi óndiris oryndaryn ashyp, infraqurylymdy jańǵyrtyp, mektepter, aýrýhanalar jáne basqa da áleýmettik nysandardy salyp jatyrmyz. Halqymyzdyń igiligi úshin kóptegen jobany iske asyrý josparymyzda bar.
Eń bastysy, biz alysqa kóz tigetin ult retinde jasampaz maqsattar men uly murattar jolynda uiysyp, jarqyn bolashaqqa zor senimmen umtylamyz.
Búginde bilimpazdyq, adal eńbek, joǵary jaýapkershilik jáne shynaiy otanshyldyq qasietteri halqymyzdyń bolmysyna sińip, ómirlik daǵdysyna ainalýda.
Biz Zań men Tártip, Tazalyq pen Qorshaǵan ortaǵa qamqorlyq, Birlik pen Kelisim qundylyqtaryn keń aýqymda dáriptep, qoǵamda jańa etika qalyptastyrý isin qolǵa aldyq.
Osylaisha, egemendigimizdiń tuǵyryn kúsheitip, Ádiletti, Qaýipsiz, Ozyq ári Taza Qazaqstandy quryp jatyrmyz.
Elimizdiń shańyraǵy biik, ultymyzdyń rýhy asqaq bolsyn!
Kók bairaǵymyz árdaiym biikte jelbiresin!
Respýblika kúni qutty bolsyn!", - delingen Prezident quttyqtaýynda.
