Qazaqstan Prezidenti Qasym-Jomart Toqaev Respýblika kúni qarsańyndaǵy jiynda el ekonomikasynyń ósimi, halyqtyń ál-aýqaty jáne ónerkásip salasyndaǵy jetistikter týraly aitty, dep habarlaidy ult.kz.
Memleket basshysynyń sózinshe, 2019 jyldan beri Qazaqstan ekonomikasy 30 paiyzǵa jýyq ósken. Al jan basyna shaqqandaǵy jalpy ishki ónim kólemi 15 myń dollardan asqan.
«Ulttyq qor – balalarǵa» jobasy aiasynda 7 million balanyń esepshotyna 2,5 milliard dollar aýdarylǵan. Byltyr elde 20 million sharshy metrden astam turǵyn úi salynyp, bul kórsetkish rekordtyq deńgeige jetken.
Prezident azamattardyń ortasha ómir súrý uzaqtyǵy 76 jasqa jaqyndaǵanyn atap ótti. Sondai-aq Qazaqstan bul kórsetkish boiynsha óńirde kósh bastap turǵanyn aitty.
Toqaev ulttyq ekonomikanyń áleýetine toqtalyp, eldiń jalpy ishki ónimi 350 milliard dollarǵa jaqyndaǵanyn jetkizdi. Onyń aitýynsha, bul kórsetkish boiynsha Qazaqstan Táýelsiz Memleketter Dostastyǵy elderi arasynda ekinshi orynda tur. Al shaǵyn jáne orta biznestiń ekonomikadaǵy úlesi 40 paiyzǵa jetken.
Óńdeý ónerkásibiniń eksporty 45 paiyzdan asty
Memleket basshysy sońǵy jyldary óndiris pen kólik-logistika salasynda da ilgerileý bar ekenin aitty.
Sońǵy bes jylda óńdeý ónerkásibindegi eksport kólemi 45 paiyzdan asqan. Qazaqstanda temirjol salasyna qajetti relster men shpaldardan bastap, vagondar men elektrovozdarǵa deiin óndirile bastaǵan.
Avtokólik óndirisi de qarqyn alǵan. Prezidenttiń málimetinshe, elimizde jyl saiyn 150 myńnan astam jeńil jáne júk kóligi shyǵarylady.
Sonymen qatar sońǵy jeti jylda Qazaqstanǵa 155 milliard dollar investitsiia tartylǵan.
«Jyl basynan beri jalpy somasy 60 milliard dollar bolatyn 355 kommertsiialyq kelisimge qol qoiyldy. Osynyń ózi kóp nárseni ańǵartady», – dedi Qasym-Jomart Toqaev.
Prezident Qazaqstannyń Eýraziiadaǵy jetekshi kólik-logistika haby retindegi rólin de atap ótti. Onyń sózinshe, elde áýejailar, vokzaldar, kópirler men teńiz ailaqtary salynyp, jóndelip jatyr. Shekara mańyndaǵy infraqurylymdy jańǵyrtý jumystary da jalǵasady.
