Қазақстан Тәуелсіздігіне 25 жыл

“Amanattyń júgi aýyr”: Baǵdat Áshimova Asanáli Áshimovtiń oryndalmai ketken armanyn aitty

“Amanattyń júgi aýyr”: Baǵdat Áshimova Asanáli Áshimovtiń oryndalmai ketken armanyn aitty
Foto: Neirojeli arqyly jasaldy

Halyq ártisi Asanáli Áshimovtiń jary Baǵdat Áshimova óner iesiniń amanaty men oryndalmai qalǵan armany týraly jazdy, dep habarlaidy ult.kz.

Ol áleýmettik jelidegi paraqshasynda marqumnyń jyldyq asynda sóilegen sózin bólisken. Baǵdat Áshimova úshin jarynyń urpaǵy men ózi baýlyǵan shákirtteriniń orny bólek.

“Meniń oń qanatym, meniń tiregim, meniń barym – Asekeńniń urpaǵy. Sol qanatym – Asanáli Áshimov teatrynyń akterleri. Asekeńniń amanaty…” – dep jazdy ol.

Óner iesiniń kózi tirisinde ańsaǵan tilekteriniń biri – óz atyndaǵy teatrdyń jeke ǵimaratyna qol jetkizýi edi. Baǵdat Áshimova jarynyń osy armany oryndalsa degen úmitin jetkizdi.

“Asanáli Áshimov atyndaǵy teatrdyń óz aldyna jeke ǵimaraty bolyp, akterleriniń bas qosar qasietti sahnasy, ónerdiń órken jaiǵan ordasy bolsa degen arman-tilegi bar edi. Sol arman oryndalyp, shákirtteri óz shańyraǵynyń astynda óner kórsetse eken!” – dedi ol.

Baǵdat Áshimova jarynyń shákirtteri men óner ujymyn da artynda qalǵan amanaty dep biledi. Olardyń shyǵarmashylyq jolyn jalǵap, bir shańyraq astynda óner kórsetýi ózi úshin qymbat ekenin ańǵartty.

“Amanattyń júgi aýyr. Artynda qalǵan izdi jalǵaý – úlken jaýapkershilik”, – dep túiindedi ol.

Aita keteiik, Baǵdat Áshimova Asanáli Áshimovtiń urpaqtaryn tanystyrdy.

Asanáli Áshimov kim?

Asanáli Áshimov — qazaqtyń kórnekti teatr jáne kino akteri, rejisser, ustaz, Qazaqstannyń jáne KSRO-nyń halyq ártisi, Qazaqstannyń Eńbek Eri. 1937 jyly 8 mamyrda Jambyl oblysy Sarysý aýdanynyń Jaiylma aýylynda dúniege kelgen.

Kórermenge “Qyz Jibek” filmindegi Bekejan, “Atamannyń aqyry” kartinasyndaǵy Shadiiarov, “Transsibir ekspresindegi” Qasymhanov rólderimen keńinen tanylǵan.

Muhtar Áýezov atyndaǵy Qazaq ulttyq drama teatrynda eńbek etip, qazaq sahnasy men kinosynyń damýyna zor úles qosqan. Rejisser retinde “Shoqan Ýálihanov”, “Qozy Kórpesh – Baian sulý” týyndylaryn túsirgen.