Almaty qalasynyń Almaly aýdandyq sotynda zańger ári bloger Ádilethan Moldahanǵa qatysty sot protsesi bastaldy. Ol «kórineý jalǵan aqparat taratty» degen aiyp boiynsha jaýapqa tartylyp otyr, dep habarlaidy ult.kz.
Sot otyrysy barysynda ol ózine taǵylǵan aiypty tolyq moiyndaitynyn aitty.
Is boiynsha jábirlenýshi retinde Almaty qalalyq politsiia departamenti basshysynyń burynǵy orynbasary Erjan Uzabaev pen ákimshilik politsiia basqarmasynyń basshysy Serik Shumaev tanylǵan. Erjan Uzabaevtyń múddesin qorǵaýshy tarap aiyptalýshydan 10 million teńge kóleminde moraldyq ótemaqy jáne 1 million teńge sot shyǵyndaryn óndirip berýdi surady.
Aiyptalýshynyń qorǵaýshylary sottan ony úiqamaqqa aýystyrýdy jáne taraptardy mediatsiia tártibimen tatýlastyrý múmkindigin qarastyrýdy ótingen. Alaida sýdia Erlan Qasymbek bul ótinishti qanaǵattandyrmai, bultartpaý sharasyn ózgertýden bas tartty. Al protsessýaldyq kelisim jasaý máselesi prokýratýranyń qaraýyna jiberildi.
Eske sala keteiik, buǵan deiin Ádilethan Moldahan Ál-Farabi dańǵylynda bolǵan rezonansty jol-kólik oqiǵasyna joǵary laýazymdy tulǵalardyń balalary qatysy bolýy múmkin ekenin jáne zańsyz túngi avtojarystardyń faktilerin politsiia jasyryp otyr dep málimdegen bolatyn. Osy jariia málimdemelerinen keiin ol naýryz aiynda qamaýǵa alynǵan.
Is boiynsha kelesi sot otyrysy 16 maýsymǵa belgilendi.
