3-5 шілде аралығында тау беткейлерінен су қарқынды ағып, өзендердегі су деңгейі көтеріледі, деп хабарлайды ult.kz.
"Қазселденқорғау" Алматы, Жамбыл және Жетісу облыстарының таулы және тау бөктеріндегі аудандарының тұрғындарына көшкін мен сел жүру қаупі туралы ескерту жасады.
"3-5 шілде аралығында ауа температурасының жоғары болуы және нөсер жаңбырлардың болжануына байланысты тау беткейлерінен су қарқынды ағып, өзендердегі су деңгейі көтеріледі. Соның салдарынан жер көшкіні мен сел жүруі мүмкін", – делінген "Қазселденқорғау" хабарламасында.
Сонымен қатар ойпаң жерлерді де су басу қаупі бар.
Аталған өңірлердің тұрғындары мен қонақтарына тауға шықпау және қауіпсіздік шараларын қатаң сақтау ұсынылды.
"Қарғалы, Ақсай, Үлкен Алматы және Кіші Алматы өзендеріне тәулік бойы мониторинг жүргізіліп жатыр. Қазіргі уақытта жағдай тұрақты", – делінген хабарламада.
"Қазселденқорғау" мәліметінше, Алматы қаласы аумағындағы өзендердегі жағдай тұрақты бақылауда.
