Брюссельде Мемлекет басшысы Қасым-Жомарт Тоқаевтың, Еуропалық кеңес Президенті Антониу Коштаның және Еуропалық комиссия Президенті Урсула фон дер Ляйеннің қатысуымен екіжақты маңызды құжаттар пакетіне қол қою рәсімі өтті, деп хабарлайды Ult.kz.
Бекітілген келісімдер отандық авиация мен көлік инфрақұрылымын ауқымды жаңғыртуға, жол секторын цифрландыруға, сондай-ақ еліміздің өнеркәсіптік әлеуетін арттыруға бағытталған.
Құжаттар ішіндегі ең негізгісі — «Air Astana» авиакомпаниясының еуропалық Airbus концернінен 50-ге жуық жаңа әуе кемесін сатып алу жөніндегі стратегиялық тапсырысы болды. Бұл келісім Қазақстан мен Еуроодақ арасындағы әуе қатынасының нормативтік-құқықтық базасын нығайтатын «Әуе тасымалының кейбір аспектілері туралы» үкіметаралық құжатпен бекітілді.
Авиациямен қатар, тараптар Транскаспий халықаралық бағдары бойындағы жерүсті логистикасын дамытуға да айрықша мән берді. Осы бағытта Еуропалық инвестициялық банк «ҚазАвтоЖол» ұлттық компаниясымен осы стратегиялық дәлізге кіретін аймақтық автожолдарды қалпына келтіру жобаларын қаржыландыру туралы келісімге қол қойды.
Еуропалық қайта құру және даму банкімен (ЕҚДБ) серіктестік те технологиялық жаңарудың маңызды қадамына айналды. Көлік министрлігі мен ЕҚДБ арасында интеллектуалды көлік жүйелерін енгізу және «Е-жолдары» цифрлық платформасын іске қосуға арнайы грант бөлу жөнінде меморандум жасалды.
Бұдан бөлек, Өнеркәсіп және құрылыс министрлігі мен ЕҚДБ бірлесіп, Қазақстанда Минералдар мен металдар саласындағы озық тәжірибелік орталық құру үшін техникалық-экономикалық негіздеме (ТЭН) әзірлеуге уағдаласты.
