Елордада төбесіне металл конструкция құлап, зардап шеккен әйел 20 күннен бері реанимацияда жатыр. Бұл туралы ақпарат Нұр-Сұлтан қаласы қоғамдық денсаулық сақтау басқармасынан келіп түсті, деп хабарлайды ҚазАқпарат.
«Науқас әлі күнге дейін реанимация бөлімінде жатыр. Жағдайы ауыр», - деп хабарлады басқармадан.
Еске сала кетейік, 22 қазан күні Нұр-Сұлтанда көпқабатты үй шатырынан металл конструкция құлады.
Оқыс оқиға салдарынан 56 жастағы әйел түрлі жарақат алып, жансақтау бөліміне түсті.
Сондай-ақ, қалалық полиция департаменті болған оқиғаға қатысты ҚР Қылмыстық кодексінің 306-бабына сәйкес сотқа дейінгі тергеу амалдарының басталғанын хабарлады.
Кейін елорданың қоғамдық денсаулық сақтау басқармасы науқастың өте ауыр халде екенін және оған тиісті медициналық көмектің көрсетіліп жатқанын мәлімдеді.
