Балаларды қорғау күніне орай TikTok Орталық Азия елдерінде «Қауіпсіз интернет үшін бірге!» атты ақпараттық-білім беру науқанын іске қосты. Бастама жасөспірімдердің цифрлық қауіпсіздігін арттыруға, салауатты онлайн әдеттерді қалыптастыруға және ата-аналар мен балалар арасындағы ашық диалогты дамытуға бағытталған, деп хабарлайды ult.kz.
Науқан аясында қазақ, қырғыз, өзбек, тәжік және түрікмен тілдерінде анимациялық бейнероликтер әзірленді. Онда TikTok-тағы «Отбасылық параметрлер» функциясын пайдалану, жас шектеулері, кибербуллингтің алдын алу, жасөспірімдерге арналған қауіпсіздік құралдары және экран алдында өткізілетін уақытты басқару мәселелері түсіндіріледі.
Платформа мәліметінше, TikTok-ты тек 13 жастан асқан пайдаланушылар қолдана алады. Ал 16 жасқа толмағандардың аккаунттарына қосымша қауіпсіздік және құпиялық шектеулері енгізілген.
Компания жасөспірімдердің интернеттегі қауіпсіздігі тек технологиялық құралдарға емес, ата-аналар мен балалар арасындағы сенімге негізделген қарым-қатынасқа да байланысты екенін атап өтті.
TikTok алдағы уақытта да цифрлық қауіпсіздік пен пайдаланушылардың әл-ауқатын арттыруға бағытталған білім беру жобаларын жалғастыратынын мәлімдеді.
