Өскеменде сауда орталықтарының біріндегі дүкеннен үш құлаққап ұрлады деген күдікпен 28 жастағы ер адам ұсталды, деп хабарлайды ult.kz.
Polisia.kz мәліметінше, полицияға дүкеннен құлаққаптардың ұрланғаны туралы хабарлама түскен. Алдын ала мәлімет бойынша, ұрланған тауарлардың жалпы құны 157 мың теңгеден асқан. Осыған байланысты дүкен иесіне едәуір материалдық шығын келген.
Жедел-іздестіру шаралары барысында күдіктінің жеке басы анықталып, ұсталды. Тергеу кезінде оның дүкенге екі рет келгені белгілі болған.
Бірінші рет ол құлаққаптардың бір бөлігін жасырын түрде алып шығып, кейін кездейсоқ өтіп бара жатқан адамға 10 мың теңгеге сатып жіберген. Арада бірнеше сағат өткен соң дүкенге қайта оралып, қалған тауарларды да ұрлап, оларды дәл сондай сомаға өткізген.
Қазіргі уақытта аталған факті бойынша ұрлық белгілерімен сотқа дейінгі тергеу жүргізіліп жатыр.
Күдіктіге қатысты ешқайда кетпеу және өзін дұрыс ұстау туралы міндеттеме түріндегі бұлтартпау шарасы қолданылды.
