Саясаттанушы Ғазиз Әбішев Каспийдегі қайғылы оқиға айналасындағы қоғамдық және медиа алаңның өзгерісін егжей-тегжейлі талдап, мемлекеттік органдардың алғашқы күндердегі дағдарыстық коммуникациядан жағдайды құқықтық әрі ақпараттық тұрғыдан толық бақылауға көшкенін атап өтті, деп хабарлайды Ult.kz.
24–25 қыркүйек аралығында ақпараттық кеңістіктегі жағдай өте алаңдатарлық, кей жерлерде тіпті дағдарыстық сипатта болды, өйткені қорғаныс ведомствосы жұртшылықпен жедел әрі ашық диалог орната алмады. Дегенмен 26 қыркүйекте күн тәртібі нақтылана түсіп, 27 қыркүйекте Мемлекет басшысының шешімдері арқасында сапалы бетбұрыс орын алды.
Қасым-Жомарт Тоқаев болған оқиғаға тікелей баға беріп, оны армиядағы жүйелік кемшіліктермен байланыстырды, Қорғаныс министрлігінің басшылығын ауыстырды және он күн ішінде Әскери реформа жоспарын дайындауды тапсырды.
Негізгі міндеттердің қатарында шығыстардың тиімділігі, цифрландыру, кадрлық іріктеудің ашықтығы мен әскери қызметшілердің қауіпсіздігі белгіленді.
29 қыркүйекке қарай мемлекеттік органдар бастаманы толықтай өз қолына алып, назарды алғашқы эмоционалдық шоктан нақты жұмыс нәтижелеріне бұра алды.
Қазіргі уақытта іздестіру операциясы аяқталды, зардап шеккендердің отбасыларына мемлекеттік көмек көрсетілді, күдіктілер анықталып, қылмыстық тергеу жалғасуда және Қорғаныс министрлігінде кешенді тексеру басталды. Сарапшы мемлекеттің жүйелі шешімдердің айқын логикасын құра алғанын баса айтады.
«28 қыркүйекте мемлекеттік коммуникация жаңа шеңберді қалыптастыра бастады: "қайғылы оқиға орын алды – мемлекет жүйелі қорытынды жасады – Президент реформа жүргізу туралы шешім қабылдады"».
Әбішев биліктің қорғаныс позициясынан шығып, ақпараттық басымдықты өз қолына алғанын атап өтеді. Сонымен бірге Ақорда үшін басты міндет осы бастаманы ұстап тұру болып қала береді.
«Әрине, Ақордаға бұл бастаманы ұстап тұру және оны реформа нәтижелерін қоғамның орнықты түсінуіне айналдыру қажет болады. Мемлекеттік органдар Президенттің тапсырмаларын орындау бойынша жұмысты жұртшылыққа көрсете отырып, өздерінің кәсіби жарамдылығын дәлелдеуі тиіс. Содан кейін мемлекет қоғамдық күн тәртібін қалыптастыруды жалғастырып қана қоймай, өзінің сенім рейтингін де арттыра алады».
