Қазақстан аумағында атмосфералық фронтальды бөліктердің өтуіне байланысты алдағы күндері ауа райы құбылмалы болады. Синоптиктердің болжамынша, республиканың басым бөлігінде жаңбыр жауып, найзағай ойнайды, деп хабарлайды ult.kz.
2 маусым күні Павлодар облысында қатты жаңбыр жауады деп күтілуде. Ал 3 маусымда Атырау және Маңғыстау облыстарында нөсер жаңбыр болжанса, 3-4 маусым аралығында Ақтөбе облысында жауын-шашынның мол түсуі ықтимал. 4 маусымда Қостанай облысында да қатты жаңбыр жауады деп болжанып отыр.
Кейбір өңірлерде бұршақ түсіп, желдің екпіні күшеюі мүмкін. Сонымен қатар республика бойынша желдің күшеюі күтіледі. Оңтүстік-батыс және оңтүстік аймақтарда шаңды дауылдың болуы ықтимал.
Алдағы күндері ауа температурасы өңірлерге қарай әртүрлі болады. Батыс өңірлерде күндіз ауа температурасы +23...+28 градусқа дейін көтеріледі. Солтүстік-батыста температура +13...+26 градус аралығында болады.
Солтүстік өңірлерде күннің жылынуы жалғасып, ауа температурасы +25...+32 градусқа дейін жетеді. Республиканың орталығы мен шығысында күндізгі температура +27...+36 градусқа дейін жоғарылайды.
Ал оңтүстік және оңтүстік-шығыс өңірлерде ауа температурасы сәл төмендеп, +25...+35 градус шамасында сақталады.
Мамандар тұрғындарға ауа райының күрт өзгеруіне байланысты сақтық шараларын сақтап, дауылды ескертулерді қадағалап отыруға кеңес береді.
