Бішкектегі митинг кезінде жарақат алған 16 адам ауруханаға жеткізілді, деп хабарлайды "Ұлт ақпарат" Кабар агенттігіне сілтеме жасап.
Шұғыл мәліметке сенсек, Бішкек стационарларына 16 адам түскен. Бұл жайында агенттікке Қырғызстанның Денсаулық сақтау министрлігі хабарлаған.
Бішкек уақытымен сағат 22:00 кезіндегі ақпарат бойынша, Бішкектің травматология және ортопедия ғылыми-зерттеу орталығына түрлі жарақатпен 4 адам жеткізілген.
Денсаулық сақтау министрлігі жанындағы Ұлттық коспитальде 10 адам ем алып жатыр. Ал қалалық клиникалық ауруханаға митингте зардап шеккен 2 науқас жатқызылған.
«Жарақаттың сипаты нақтыланып жатыр, ол жайлы кейін толығырақ хабарланады» деп атап өтті министрлік.
Еске сала кетейік, бүгін Бішкекте Жогорку Кенеш депутаттарының сайлауына көңілі толмаған бір топ адам орталық алаңда митинг ұйымдастырып, одан кейін Ақ үйге беттеді. Оларды қуу үшін полиция мен арнайы жасақ қызметкерлері көз жасаурататын газ қолданған. Сондай-ақ, арнайы автокөлік және иттердің көмегімен демонстранттарды екіге бөліп жіберген.
Ала-Тоо алаңындағы оқиға кезінде "Ата Мекен" партиясының атынан сайлауға түскен кандидат Жанар Ақаев жарақат алды. Бұл туралы Ақаевтың көмекшісі Орозбек Муратов хабарлады. Оның айтуынша, аяғынан жараланған Ақаевты ауруханаға жеткізу үшін "Жедел жәрдем" шақырылған. Интернетте жарияланған видеода Ақаевты бірнеше адамның көтеріп бара жатқаны байқалады.
Қырғызстан денсаулық сақтау министрлігінің баспасөз хатшысы Жылдыз Айгерчинованың айтуынша, Ала-Тоо алаңында митингіге шыққандарды тарату кезінде күш құрылымдарының екі қызметкері жараланған, екеуінің де миы шайқалған. Оларды "Жедел жәрдем" қызметі ауруханаға алып кетті.
Қырғызстандағы үлкен қалалардың бірі, Ыстықкөл облысының орталығы Караколдың орталық алаңына 5 қазан түнгі 21:30 шамасында наразы жұрт жинала бастады.
Облыстың басқа ауылдарының тұрғындары Бішкектегі наразылыққа қатысу үшін астанаға кетіп жатыр деген ақпарат бар.
5 қазанда күндіз де Каракол қаласында сайлау қорытындысымен келіспейтіндердің жиыны өткен.
Қырғызстанның Ресейге бүйрегі бұратын президенті Сооронбай Жээнбековке жақын партиялар 4 қазанда өткен парламент сайлауында депутаттық орындардың басым бөлігін иеленді. Оппозиция "заң бұзу көп болғандықтан, сайлау нәтижесін мойындамаймыз" деді.
Алдын ала нәтижелерге қарасақ, 7 пайыздық межеден өткен төрт партия Қырғызстанның 120 орындық парламенті – Жогорку кенешке депутат жіберу мүмкіндігіне ие болған.
Жаңа құрылған билік партиясы – "Биримдик" (Бірлік) 24,5 пайыз дауыс алса, "Мекеним Кыргызстан" (Мекенім – Қырғызстан) - 23,88, "Кыргызстан" 8,76 пайыз дауыс жинаған.
Бұл үш партия үкіметті қолдайтын саяси ұйымдар ретінде сипатталады. "Биримдик" те, "Мекеним Кыргызстан" да Мәскеу үстемдік ететін Еуразия экономикалық одағын жақтайды және Ресеймен қауіпсіздік саласында жақын ынтымақтасу керек деп есептейді.
Оппозициядан жалғыз "Бүтүн Кыргызстан" ("Біртұтас Қырғызстан") партиясы ғана 7,13 пайыз дауыспен межеден өте алды. Додаға түскен қалған 12 партия парламентке өтпей қалды.
992 рет оқылды
