Bishkektegi miting kezinde jaraqat alǵan 16 adam aýrýhanaǵa jetkizildi, dep habarlaidy "Ult aqparat" Kabar agenttigine silteme jasap.
Shuǵyl málimetke sensek, Bishkek statsionarlaryna 16 adam túsken. Bul jaiynda agenttikke Qyrǵyzstannyń Densaýlyq saqtaý ministrligi habarlaǵan.
Bishkek ýaqytymen saǵat 22:00 kezindegi aqparat boiynsha, Bishkektiń travmatologiia jáne ortopediia ǵylymi-zertteý ortalyǵyna túrli jaraqatpen 4 adam jetkizilgen.
Densaýlyq saqtaý ministrligi janyndaǵy Ulttyq kospitalde 10 adam em alyp jatyr. Al qalalyq klinikalyq aýrýhanaǵa mitingte zardap shekken 2 naýqas jatqyzylǵan.
«Jaraqattyń sipaty naqtylanyp jatyr, ol jaily keiin tolyǵyraq habarlanady» dep atap ótti ministrlik.
Eske sala keteiik, búgin Bishkekte Jogorký Kenesh depýtattarynyń sailaýyna kóńili tolmaǵan bir top adam ortalyq alańda miting uiymdastyryp, odan keiin Aq úige bettedi. Olardy qýý úshin politsiia men arnaiy jasaq qyzmetkerleri kóz jasaýratatyn gaz qoldanǵan. Sondai-aq, arnaiy avtokólik jáne itterdiń kómegimen demonstranttardy ekige bólip jibergen.
Ala-Too alańyndaǵy oqiǵa kezinde "Ata Meken" partiiasynyń atynan sailaýǵa túsken kandidat Janar Aqaev jaraqat aldy. Bul týraly Aqaevtyń kómekshisi Orozbek Mýratov habarlady. Onyń aitýynsha, aiaǵynan jaralanǵan Aqaevty aýrýhanaǵa jetkizý úshin "Jedel járdem" shaqyrylǵan. Internette jariialanǵan videoda Aqaevty birneshe adamnyń kóterip bara jatqany baiqalady.
Qyrǵyzstan densaýlyq saqtaý ministrliginiń baspasóz hatshysy Jyldyz Aigerchinovanyń aitýynsha, Ala-Too alańynda mitingige shyqqandardy taratý kezinde kúsh qurylymdarynyń eki qyzmetkeri jaralanǵan, ekeýiniń de miy shaiqalǵan. Olardy "Jedel járdem" qyzmeti aýrýhanaǵa alyp ketti.
Qyrǵyzstandaǵy úlken qalalardyń biri, Ystyqkól oblysynyń ortalyǵy Karakoldyń ortalyq alańyna 5 qazan túngi 21:30 shamasynda narazy jurt jinala bastady.
Oblystyń basqa aýyldarynyń turǵyndary Bishkektegi narazylyqqa qatysý úshin astanaǵa ketip jatyr degen aqparat bar.
5 qazanda kúndiz de Karakol qalasynda sailaý qorytyndysymen kelispeitinderdiń jiyny ótken.
Qyrǵyzstannyń Reseige búiregi buratyn prezidenti Sooronbai Jeenbekovke jaqyn partiialar 4 qazanda ótken parlament sailaýynda depýtattyq oryndardyń basym bóligin ielendi. Oppozitsiia "zań buzý kóp bolǵandyqtan, sailaý nátijesin moiyndamaimyz" dedi.
Aldyn ala nátijelerge qarasaq, 7 paiyzdyq mejeden ótken tórt partiia Qyrǵyzstannyń 120 oryndyq parlamenti – Jogorký keneshke depýtat jiberý múmkindigine ie bolǵan.
Jańa qurylǵan bilik partiiasy – "Birimdik" (Birlik) 24,5 paiyz daýys alsa, "Mekenim Kyrgyzstan" (Mekenim – Qyrǵyzstan) - 23,88, "Kyrgyzstan" 8,76 paiyz daýys jinaǵan.
Bul úsh partiia úkimetti qoldaityn saiasi uiymdar retinde sipattalady. "Birimdik" te, "Mekenim Kyrgyzstan" da Máskeý ústemdik etetin Eýraziia ekonomikalyq odaǵyn jaqtaidy jáne Reseimen qaýipsizdik salasynda jaqyn yntymaqtasý kerek dep esepteidi.
Oppozitsiiadan jalǵyz "Bútún Kyrgyzstan" ("Birtutas Qyrǵyzstan") partiiasy ǵana 7,13 paiyz daýyspen mejeden óte aldy. Dodaǵa túsken qalǵan 12 partiia parlamentke ótpei qaldy.
