Kásipker Jumabek Janyqul men onyń jubaiy, telejúrgizýshi Dinara Janyqulova ótkenge oralý múmkindigi berilse, ómiriniń qai kezeńin qaita bastan ótkergisi keletinin aitty, dep habarlaidy ult.kz.
Erli-zaiyptylar bul týraly "Zamanback-2" filminiń jabyq kórsetiliminen keiin jýrnalist Nazerkeniń suraǵyna jaýap bergen.
Áleýmettik jelidegi jariialanǵan videoda jýrnalist jupqa ótken ómirine qaita oralý múmkindigi týsa, qai ýaqytty tańdaitynyn jáne kimmen sóileskisi keletinin suraidy. Jumabek Janyqul bul saýalǵa jaýap bergende jaqynda dúnieden ótken ákesin eske alyp, onymen taǵy bir márte tildesýdi qalaitynyn jasyrmady.
"Oibai… Meniń ákem jaqynda qaitqandyqtan, ákemmen sóilesetin edim qaita-qaita. Basqa nusqa joq, tek ákemmen sóilesetin edim", – dedi kásipker.
Al Dinara Janyqulova ótkenge oralsa, mekteptegi sońǵy jylyn qaita ótkizgisi keletinin aitty.
"Al men 1999 jylǵa, 11-synypqa qaitar edim. Ótkenge qýana oralar edim. Bul keremet qoi, biraq 1945 jylǵa emes", – dep ázildedi telejúrgizýshi.
Osylaisha, Jumabek úshin ótkenge oralýdyń basty sebebi ákesimen qaita qaýyshý bolsa, Dinara jastyq shaǵyn taǵy bir márte sezingisi keletinin jetkizdi.
Al videony jariialaǵan jýrnalist Dinaranyń nelikten 1945 jyldy atap ótkenin túsingisi keletinderge "Zamanback-2" filmin kórýge keńes berdi.
Jumabek Janyqulov kim?
Jumabek Esilbekuly Janyqulov – qazaqstandyq kásipker, investor jáne qoǵam qairatkeri. Ol óndiris, metallýrgiia, himiia ónerkásibi jáne meditsina salalaryndaǵy biznes jobalarymen tanymal. 2022 jyly Forbes Kazakhstan jýrnaly jariialaǵan "Qazaqstannyń eń yqpaldy 50 biznesmeni" reitinginde 46-orynǵa ie boldy. Kásipker Qaraǵandy oblysynda barit kenin óńdeýmen ainalysatyn Karazhal Operating kompaniiasynyń negizin qalaǵan.
Sondai-aq taý-ken jáne munai-gaz salasyna himiialyq ónimder jetkizetin Global Chemicals Company kásipornyn qurǵan. Jumabek Janyqulov Taraz metallýrgiialyq zaýyty men Temirtaý elektrometallýrgiialyq kombinatynyń prezidenti retinde de belgili. Onyń biznes jobalarynyń qatarynda Nova Medical Centre meditsinalyq diagnostikalyq ortalyqtar jelisi bar. Kásipker "Kemel Urpaq" qoǵamdyq qorynyń negizin qalap, bilim berý jáne áleýmettik bastamalardy qoldaýǵa atsalysqan. Sonymen qatar ol PARYZ ulttyq jumys berýshiler konfederatsiiasy prezidiýmynyń tóraǵasy retinde tanylǵan.
2025 jyldyń sáýirinde Jumabek Janyqulov belgili telejúrgizýshi ári kásipker Dinara Sátjanmen nekelesken
