Aqtóbe oblysynda qyzý talqyǵa túsken jylqyshy Rahat Sársenovke qatysty daýǵa onyń burynǵy jumys berýshisi Tájiǵali Eleýov pikir bildirdi, dep habarlaidy ult.kz.
Eleýovtiń sózinshe, áleýmettik jelide jáne keibir aqparat quraldarynda taraǵan málimetterdiń arasynda shyndyqqa janaspaityn derekter bar. Ol Rahat Sársenovtiń birneshe balasy bar ekenin jáne uzaq jyldar boiy sharýashylyǵynda eńbek etkenin aityp, jylqyshynyń «quldyqta boldy» degen sózimen kelispeitinin jetkizdi.
Burynǵy jumys berýshi Sársenovtiń keide jumysyna ishimdik iship kelgenin jáne uzaq ýaqytqa joǵalyp ketetin jaǵdailar bolǵanyn da aitty. Onyń málimdeýinshe, jylqyshy insýlt alyp, aýrýhanada jatqan kezinde basqa jylqyshyǵa qońyraý shalyp, ózine tiesili jylqylardyń bir bóligin aidap áketýdi tapsyrǵan.
Eleýovtiń aitýynsha, osydan keiin barlyǵy 39 jylqy aidalyp ketken. Onyń 13-i politsiia tarapynan etke soiylyp jatqan jerinen tabylǵan. Osy iske qatysy bar adamdar jaýapkershilikke tartylǵan.
Sonymen qatar Eleýov Rahat Sársenovtiń otbasyna birneshe ret kómekteskenin, onyń balalarynyń toilaryn ótkizýge qoldaý kórsetkenin atap ótti.
Buǵan qosa, ol jylqyshynyń «14 bastan 1700 basqa deiin jylqy ósirdim» degen málimdemesin de joqqa shyǵardy. Eleýovtiń sózinshe, Sársenov birneshe tabynnyń ishindegi shamamen 360 jylqyǵa jaýapty bolǵan.
Ol 2019 jyly joǵalǵan 60 bas jylqy men keiin joǵalǵan taǵy 40 jylqyǵa qatysty máselelerdiń áli de sheshilmegenin aitty.
Tájiǵali Eleýov jýrnalist Rýslan Ótepbai jariialaǵan materialdarǵa da toqtaldy. Onyń pikirinshe, sharýashylyqtaǵy ózge jumysshylardan alynǵan suhbattar tolyq jariialanbai, oqiǵa birjaqty kórsetilgen.
