Jýrnalist Ardaq Qultai tikelei efirde Sanjar Kerimbaiǵa habarlasyp, qoǵam belsendisiniń kitabyndaǵy jazbany talqylady, dep habarlaidy ult.kz.
Ardaq Qultai Sanjar Kerimbaidyń kitabyndaǵy «súiinshi suraý, tilek aitý rásimderi Paiǵambardan kelgen» degen maǵynadaǵy mátinge shúilikti. Kitapta bylai jazylǵan:
«22-bette:
«Sahaba kórgen túsin paiǵambarǵa aityp beredi. Sonda paiǵambar: “Budan bylai kelgen qýanyshty súiinshilender, súiinshi suraǵan kisini qur qol qaitarmandar. Shamalaryń jetse syilyq berińder”, – depti.»
23-bette:
«…Máýlit jyrynda jii aitylatyn bul siýjet qazaq arasyna tarap, paiǵambardyń súndetine ainaldy. Jańa týǵan nárestege kórimdik berý, qutty bolsyn aityp, súiinshi suraý, tilek aitý rásimderi qazaq dástúriniń bir bólshegin qurypty».
Sanjar Kerimbai bul jerde arabtyń emes, Paiǵambardyń qatysy baryn aitty. Jýrnalist ile-shala Paiǵambardyń ultyn surady. Sanjar Kerimbai Paiǵambarǵa ult berilmeitinin aitqanda, jýrnalist bul týraly aqparat Quranda jazylǵanyn naqtylady.
Ardaq Qultai jazýshydan «bul jazylǵan aqparatty sahih hadistermen naqtylai alasyz ba?», - dep surady.
«Bunyń sahih hadiske qatysy joq. Bul halyqtyq islam dep atalady. Bul aýyz ádebietine jaqyn bolady», - dedi Sanjar Kerimbai.
Jýrnalist artynsha «sonda bul qiialdan týǵan áńgime me?» degende Sanjar Kerimbai «iá» dep jaýap qatty.
Jýrnalist Sanjan Kerimbaiǵa bul dálelsiz aqparattardy el-eldi aralap adamdarǵa taratyp júrgeni orynsyz ekenin eskertti.
