Shyńjańdaǵy «Keiýn» intellektýaldy jabdyqtar kompaniiasy qazaqstandyq baspasóz ókilderine júrgizýshisiz jumys isteitin qoǵamdyq kólikti tanystyrdy, dep habarlaidy ult.kz.
Júrgizýshisiz shaǵyn avtobýs jasandy intellekt, kameralar, radarlar jáne basqa da datchikterdiń kómegimen qozǵalady. Kólik ainalany 360 gradýsqa deiin baqylai alady. Osy arqyly jol baǵytyn ózdiginen anyqtap, kedergilerdi ainalyp ótip, aialdamalarda jolaýshylardy túsirip, otyrǵyzady.
Foto: ult.kz
Avtobýs L4 deńgeiindegi avtonomdy júrgizý tehnologiiasymen jabdyqtalǵan. Iaǵni, qalypty jaǵdaida kólikti júrgizýshi basqarmaidy. Degenmen ár avtobýsta qaýipsizdik operatory bolady. Qajet bolǵan jaǵdaida ol basqarýǵa aralasa alady.
Kólik tolyq elektr qýatymen jumys isteidi. Onyń eń joǵary jyldamdyǵy – saǵatyna 40 shaqyrym, al bir ret qýattalǵannan keiin shamamen 200 shaqyrym jol júre alady.
Foto: ult.kz
Júrgizýshisiz avtobýstyń jumysyn qashyqtan baqylaityn arnaiy basqarý ortalyǵy da bar. Mamandar kóliktiń qozǵalysyn baqylap, qajet bolǵan jaǵdaida qashyqtan basqarýǵa múmkindik alady. Mysaly, shańdy daýyl nemese qalyń qar siiaqty kúrdeli jaǵdailarda basqarý operatorlarǵa beriledi.
Foto: ult.kz
Shyńjańdaǵy Chantszi joǵary tehnologiialar aimaǵynda mundai kólikter 2025 jylǵy 20 naýryzdan bastap qatynai bastady. Alǵashqy kezeńde eki avtobýs iske qosylǵan.
Qazirgi baǵyttyń uzyndyǵy – 9 shaqyrym. Jol boiynda 12 aialdama bar. Avtobýstar shamamen 5 minýt saiyn qatynaidy. Bir kólikke 6 jolaýshy men 1 qaýipsizdik operatory syiady.
Foto: ult.kz
Kompaniia málimetinshe, júrgizýshisiz avtobýstar qazir Qytaidyń 16 qalasynda jumys isteidi. Osy ýaqytqa deiin olar millionnan astam jolaýshy tasymaldaǵan.
Kompaniia aldaǵy ýaqytta mundai tehnologiialardy kólikpen qatar mádeniet pen týrizm salalarynda da qoldaný múmkindigin qarastyryp otyr.
Baljan Jeńisqyzy
